E aña aki e emblematico forno di calki  construi den pleno curason di Rancho ta cumpliendo 125  aña di existencia. Stichting Rancho cu ta boga e conservacion y promocion di e cultura di e bario historico aki lo probecha e ocasion aki pa bin un actividad special rond e hubileo di e monumento aki.

Asina e presidente di e fundacion aki,  Clifford Rosa a informa den e prome conferencia di prensa organisa pa nan durante 2017.  Ya caba for di cuminsamento januari  ultimo nan ta bin trahando pa traha un agenda di actividad teniendo na cuenta tanto nos kalender di e dianan nacional di Aruba, y esun di Unesco.

Calendario di actividad
E fundacion aki cu ta yegando caba na 7 aña di existencia  kier pa e hubileo aki por haya un contenido real. P’esey  nan a traha un calendario extenso pa 2017. Ya caba nan a bin cu nan T-shirt cu ta identifica nan miembronan boluntario unda nan ta haci nan logo nobo ta inspira riba e forno di calki.

Sr. Rosa ta splica cu e fundacion a pone accento riba e monumento aki, ya cu e ta unico forno di calki den nos region cu ta yega na su 125 aniversario. “Esaki ta algo unico! Pasobra si nos wak e ta un monumento industrial protegi  y e ta practicamente e unico den Caribe”. E ta bisa cu e forno aki ta practicamente e unico den su genero riba  mundo.

Considerando cu e forno aki tabata algo hopi importante pa e desaroyo di e  fundacion; pero mas tanto pa e desaroyo di e bario mes, mirando cu e ta un icono positivo pa Rancho, ya cu nan por bin cu actividad pa e bario aki. Sr. Rosa a pidi pa tur hende keda pendiente y  registra boluntariamente pa duna un man na fundacion Rancho. Aruba Doet ta tuma luga dia 10 y 11 di maart y durante e dos dianan ey nan lo ta activo. Nan lo  bin cu actividad  den nan centro y tambe na e forno di calki y rond di e hanchinan  nan  lo pone hopi atencion. Nan lo kier tene nan habri y bon ilumina pa asina e publico lo por bin presencia e forno di calki en conexion di su 125 aña di existencia.

Tambe nan kier pone atencion riba e fecha di 16 di februari den cuadro di II Guera Mundial. E lo bira un dia di reflexion riba tur loke a sosode aki na Aruba riba e parti maritimo cu e confrontacion mundial aki.  Den nan coleccion historico e fundacion tin un propela di e S.S. Oranjestad  cu lo bay haya un sitio strategico pa wordo exponi libremente cu su informacion pa publico.

Sr. Rosa ta bisa cu no mester lubida cu e fundacion aki a lanta pa conserva primeramente pa conserva e cultura y tradicion di e bario Rancho. Pero tambe pa percura pa e desaroyo socio-economico di e bario. Pa genera fondo pa e fundacion nan kier bin cu tour of paseo den e bario cu ta e prome actividadnan cu nan ta bin  cu  ne pa garantisa e sobrevivencia di e stichting aki.