Fundacion Rancho cu aliansa pa un maneho di desperdicio mas responsabel y educativo

Diaranson ultimo, Fundacion Rancho a trece dilanti un problema cu ta bin causando molestia pa hopi aña caba pa loke ta trata maneho di desperdicio den area di Rancho, pa cu esaki a wordo presenta un proyecto cu por forma parti di e solucion den un futuro.

For di 2018 te cu aworaki, manera Clifford Rosa, presidente di e fundacion a menciona, nan por mira cu tin cosnan cu a bay bon y otronan no, na unda nan a gradici e temporada di Aruba Doet pa nan por haci nan bario limpi y tambe e forno di Calki, cu ta un monumento protegi, cual a wordo conserva pa Monumentenfonds, pero na e momentonan aki nan ta esun cu ta maneh’e.

Aña pasa nan a ripara cu esey ta birando hopi pa nan por mantene e area aki limpi mirando cu tin basta sushedad, cu e bario tin mester di mas limpiesa, vooral na e momentonan aki cu dump di Parkietenbos a cera.

Den esaki, Rosa a splica cu nan a wordo acerca for di Colombia cu cierto organisacionnan cu ta haci trabounan di reciclahe unda nan a reuni algun biaha pa asina papia di e proyecto y di e problema di sushi cu mester di un solucion.

“Mirando cu nos kier tin un programa cu ta hiba nos na e celebracion di 200 aña di Oranjestad na 2024, nos ta desea di tin e bario totalmente limpi, unda por mira cu a cuminsa atende cu e problematica di sushi,” Rosa a sigura.

Nan a presenta e proyecto cu nan ta yama ‘Waste Management pa Rancho Oranjestad Aruba’. Den combinacion cu e organisacion Colombiano yama Quos, nan ta specialisa den procesamento di sushi solido pero tambe nan ta procesa sushi likido, un problema cu ta bin presentando den dianan aki y cu nan kier mira si den e procesamento di awa kico lo por ta posibel.

“Pa Fundacion Rancho esaki ta un iniciativa nobo den contexto cu nos ta trahando cu diferente organisacion pa varios proposito, manera actividadnan nacional cu nan ta haciendo pero tambe e investigacionnan cu ta wordo haci pa cultura y enseñansa den cultura, incluyendo e procesamento di ‘waste’ of reciclahe tambe como un punto di enseñansa.”

Igualmente, el a señala cu “nos tin un cultura cu ta custumbra di pone tur sushi hunto na cas y esey ya caba ta un problema cu internacionalmente no ta normal mas y e ta un tiki incomprendibel cu nos na Aruba ta pone tur cos hunto den un saco di sushi y lag’e bay. Esey ta e parti cu nos kier duna como fundacion, con nos ta bay educa nos comunidad, e transformacion di e pensamento pa e direccion cu ta factibel pa nos tur,” Rosa señala.

Esaki ta cu e obhetivo di disminui e procesamento di sushi ya cu Aruba ta un pais cu ta cumpli cu rekisitonan internacional, den dje tambe tin e metanan di desaroyo sostenibel unda nan ta enfoca den meta number 17 cu ta ‘Colaboracion’, “den e momento aki nos ta pidiendo colaboracion na tur instancia y tur medio pa informa tocante kico por y unda nos ta para awe den e tematico pa waste management pa Rancho, Oranjestad y Aruba,” Rosa a comenta.

Marcela Maria Sanchez, directora di responsabilidad social di e organisacion Quos, a splica cu nan ta specialista den e tratamento y probechamento di desperdicio solido urbano na Colombia. Nan a bin Aruba pa haci un analisis riba e situacion cu tin na e momentonan aki na e isla pa loke ta trata desperdicio, desde esun cu ta cuminsa na cas mes, e sistema di transporte y proceso di disposicion final.

“Den nos experiencia di seis aña, nos ta haci productonan termina a base di desperdicio solido cu ta yega na e dump y nos kier presenta un propuesto pa por haci e probechamento di productonan, cu actualmente nos ta distribuyendo na Colombia,” el a bisa.

E mensahe principal cu nan kier ofrece ta cu ta necesario pa compronde cu desperdicio solido ta haci parti di e bida diario, como ser humano mester integra nan y no wak nan como enemigo sino compronde con por recupera nan y integra nan bek den e cadena di produccion por medio di un economia circular cumpliendo cu obhetivo di desaroyo sostenibel.

Den e prome bishita aki, nan a haya informacion unda nan ta bay genera un analisis di documentonan, numbernan y cifranan cu hunto cu ayudo di companianan y nan aliado akinan cu ta Rancho, nan ta calcula cu den un luna y mey nan por tene un propuesto preliminar.

E siguiente paso ta pa companianan di Aruba y instancianan di gobierno por biaha na Colombia pa por conoce nan planta y e operacion cu nan ta haci cu e compania mas grandi di servicio publico di Colombia manera Sanchez a menciona “pa nan wak kico nos ta haci y con nos ta haci’e, pa por uni forsa y probecha e procesamento di desperdicio den e isla,” el a bisa.

Cu boternan di plastico nan ta haci un producto cu ta sirbi como materia prima di hilo, pa haci T-shirtnan, sapato of palo: “esaki ta pa stop di wak plastic como enemigo y compronde con nos por utilis’e pa e bira sostenibel y pa stop di genera contaminacion bentando nan den un dump,” Sanchez a afirma.

Cu saconan di plastico pa sushi, nan ta converti nan den otro saconan di plastico unda nan ta wordo usa den casnan pa e desperdicio: “nos ta produci nan, nan ta sali for di e fabrica y nan ta bin bek na e planta cu desperdicio; e ta un circulo,” el a sigura.

Cu esaki nan kier disminui e impacto di e desperdicio y tambe apoya e poblacion mas vulnerabel, Colombia tin un historia di conflicto arma for di mas di sesenta aña cu a laga hopi victima na unda tur empleado di nan organisacion ta pertenece na e grupo aki di e poblacion.

Pa finalisa, Fundacion Rancho tin interes pa wak esaki wordo realisa cu e partners na Aruba como Plastic Beach Party, pero tin mas organisacion caba cu tin e deseo di progresa unda cu nan ta bay papia cu nan den siguiente simannan dilanti pa tin un miho bista di e procesamento di desperdicio cu un miho comprendemento di productonan di plastico, carton, taira, etc.