Luna di augustus ta un luna importante pa sector cultural den Rancho, na unda cu ayera Fundacion Rancho a cuminsa cu e celebracion di 199 aña di Oranjestad, y pa otro ya caba e organisacion pa e celebracion grandi di 200 a cuminsa.

Mediante un conferencia di prensa diaranson ultimo, Clifford Rosa, presidente di e fundacion, a expresa cu ta na su luga pa informa lo cual cu Fundacion Rancho ta bin haciendo y kico ta e temanan cu nan ta bay trece dilanti pa cu e actividad aki, cu tin relacion cu e desaroyo di e comunidad cu ta importante pa e mesun habitantenan y inversionistanan, sin laga afo Gobierno di Aruba, cu ta esun cu tin cu atende cu diferente punto cu ta crucial.

Ayera a tuma luga e prome Marshe Rancho di e aña aki na unda a tuma luga un presentacion di pasado di sclavitud cu apoyo di Mondrianfoonds cu a duna e oportunidad na nan di por traha cu historia y 160 di abolicion di sclavitud, tambe a presenta e musica di Tambu dirigi pa Vicente Ras y e investigado Lili Peterson ken a haci un trabou conhunto cu Archivo Nacional pa compila informacion.

Pero esaki ta un actividad cu ta bay dura cuatro dia unda cu awe 25 di augustus ta bay tuma luga na Fundacion Rancho mes un conversatorio tocante con e sistema maritimo ta na Aruba cu e presentacion di informacion e rector di Universidad di Aruba tocante leynan maritimo, comercio maritimo, entre otro cu ta topiconan importante pa Fundacion Rancho.

Ademas ta bay tin un invitado special di e Puerto di La Goajira Colombia, ken di manera virtual ta bay trece dilanti mas informacion relaciona cu e tema maritimo.

Pa dia 26 y 27 di augustus ta bay tuma luga International Regatta unda Fundacion Rancho ta bay atende cu e botonan miniatura cu ta un herencia cultural inmaterial di e cual manera Rosa a señala mester ta hinca den sistema di educacion “ta di lamenta cu nos isla cu ta biba di biento, nos mester por sa di bela, di e awanan pero nos ta mira cu Aruba International Regatta ta ser organisa y nos mesun hendenan no ta inclui den e proyecto, di e banda aki Fundacion Rancho ta haciendo apelacion tambe na organisadonan di e evento aki pa inclui comunidad, p’esey atrobe, Fundacion Rancho ta haciendo parti di Aruba International Regatta manera cu dianan 26 y 27 nos ta bay ta na e beach dilanti di e Cas di Gobernador pa nos draai e actividad di botonan miniatura,” el a finalisa.

Fundacion Rancho kier celebra 200 aña di Oranjestad, pero mester di mas colaboracion

Durante un simposio cu a ser haci dia 20 di april “Caminda pa 200 aña di Oranjestad” a bin dilanti topiconan importante cu mester trata pa cu e celebracion grandi aki, Den e simposio aki nan a yega na e informacion cu nan tabata desea cu na 2024 den luna di augustus nan ta bay celebra e 200 aña di Oranjestad “pa nos por tin un focus diferente y dia 24 di augustus di otro aña lo sucede e momento cu ta bay celebra e nomber di Oranjestad, esey ta algo cu a concretisa den e simposio y door di esey nan a cuminsa un programa e aña aki,” Rosa a comenta.

Den e simposio a documenta informacion y tambe a haci diferente workshop, den esaki, Rosa a bisa cu tin e parti historico pero e ora ey ta haci trabounan pa evalua tambe kico lo ta e futuro di e fundacion den e contexto di 200 aña di Oranjestad na unda nan a scoge cinco tema como di siguridad alimentario, desaroyo sostenibel, maneho di desperdicio, Turismo y Eco System, mantencion di herencia.

Referente na e temanan aki a traha e workshops den gruponan unda a nan papia, dialoga y a bin cu cierto sugerencianan lo cual nan ta analisando ainda pero ya caba nan tin un bista grandi di kico tur a bin dilanti den esaki.

Den e parti di turismo, Rosa a expresa cu esey ta necesario unda turismo y Eco Sistema ta algo cu no por bay for di otro, pa loke trata siguridad alimentario nan kier pa e parti di cultivo y productonan local, agricultura, cria y pesca mester ta miho mira na Aruba y sigur den bario di Rancho, sin tambe laga afo e mantencion di herencia, riba e monumentonan, esey ta un otro tema cu nan ta bin trahando hopi duro manera Rosa a sigura pa por conserva e forno di Kalki, e tanki di awa pero tambe otro edificionan of areanan cu tin di haber cu herencia.

Pa loke ta trata waste mangement, el a bisa cu bario di Rancho mester di su mantencion vooral loke ta trata recogemento di sushi, e problema cu nan tin cu desperdicio den bario di Rancho y awor rond di Aruba tambe.

E parti di renobacion, creacion y modernisacion den area urbano tambe ta cumpli su rol den esaki pa asina por mira si pa augustus di otro aña lo por mira un Oranjestad mas limpi y mas bunita, no ta un secreto cu e area aki a bay atras den ultimo añanan y cu tin cierto puntonan cu no ta hayando atencion.

Matanan desordena, sushi riba caminda, areanan manera bandona, rails di e tram ta den mal estado y ta puntonan cu mester papia di dje na e momentonan aki, ta p’esey cu Rosa ta kere den un plan urbano mescos cu tin un ROP of ROPV, den esaki mester tin un plan urbano tambe “pasobra ta imposibel pa compronde cu tin proyectonan asina magno manera Port City pero no ta mir’e den un plan urbano”. Rosa a expresa.