Diamars ultimo a wordo conmemora Dia Internacional di Migrante. Un fecha cu Asamblea General di Nacionnan Uni (ONU) a inclui den su kalender internacional for di aña 2000, teniendo na cuenta cu e cantidad di migrante cada aña ta aumenta.
E ta un fecha di reflexion pa asina comunidad internacional sea mas consciente pa introduci medida efectivo pa protege e derechonan humano di tur migrante. Durante e aña aki, alrededor di 3,400 migrantenan y refugiadonan a perde nan bida. Pa e motibo aki, ONU a dicidi cu Dia Internacional di Migrante 2018 su tema ta: “Migracion cu dignidad”.
Considerando cu Aruba ta un isla cu historicamente a ricibi e presencia di migrantenan di tur parti di mundo, Fundacion Rancho a bin cu un agenda di cinco dia di actividadnan pa duna contenido na e fecha special. Sinembargo e presencia publico tabata masha pober mes.
Dialuna atardi a tuma luga un caminata cultural, y te hasta pedagogico di inclusion den e bario historico di Rancho. Diamars anochi den cuadro di clausura di Dia Internacional di Migrante, fundacion Rancho a bin cu un celebracion na Plasa di Rancho Visstraat/John G. Emanstraat 9. Dj Caleto hunto cu e polifacetico docente Roland Tromp a percura pa e ambiente musical ta bon anima cu musica Caribeño. Tambe tabatin benta di variedad di producto riba caya y cuminda Caribeño.
