Diadomingo ultimo, fundacion Rancho a realisa full un programa bon hinca den otro pa duna contenido na e Dia Internacional di Migrante.
Haciendo uzo di e facilidad di e Centro di Actividad di Rancho na Koningstraat 38, e periodista Benjamin Romero a papia di su buki nobo” E historia di Koffie na Aruba”. El a referi basicamente na e actividad di koffie riba waf y e trahadonan entre nan hendenan di Rancho cu a labora den e actividad aki.
Igualmente Zetsia Ponson kende ta Secretario General di Unesco-Aruba y e Linguista Ramon Todd Dandaré a referi riba e topico di Migrante. Con Aruba a bira un pais cu a habri brasa pa un cantidad di migrante di tur nacionalidad. Pero tambe con den pasado Aruba su hende a yega di imigra pa entre otro Cuba y Colombia. Sr. Todd Dandaré a referi cu tin migrante bon y migrante malo. Esun bon ta esun cu ta bin traha honestamente na beneficio di e pais cu a duna nan y na nan famia un segundo oportunidad. Y e migrante malo ta esun cu ta bin crea problema y no ta brinda niun beneficio pa e pais.
Algo masha bunita tabata e expo Den Hanch’i Construccion cu Adopt an Alley, un proyecto bou encargo di Ginelly Quandt. Nan tabata lampinan traha na man y cu material recicla masha creativo y bunita. E broche di oro tabata na encargo di Estrellas del Bario, un grupo tradicional di musica Gaita cu un gran trayectoria y historia. Despues di hopi aña nan integrantenan a uni bek pa asina crea un ambiente unico den cuadro di celebracion di Pasco y Fin di Aña 2016.
Presidente di Stichting Rancho, Sr. Clifford Rosa a gradici muy specialmente CEDE Aruba y tur nan partnernan y boluntario cu a percura pa e bunita anochi aki.
