E aña aki Fundacion Pro Lechi Mama ta cumpli 20 aña di existencia. En conexion cu e gran celebracion aki e fundacion ta organisando un ‘breastfeeding masterclass’ pa futuro mamanan y mamanan recien na unda lo duna informacion detaya y amplio tocante e periodo di lactancia materno y con por maneha e proceso aki di manera optimal.

Carol Kock, presidente Fundacion Pro Lechi Mama a indica cu e aña aki Fundacion Por Lechi Mama ta cumpli 20 aña di existencia y nos ta celebrando esey aceptando e concepto di masterclass. Den e masterclass aki tur futuro mama y mamanan recien den un solo mainta lo haya tur e conocemento necesario cu nan tin mester pa haci e periodo di lactancia uno exitoso.

“Pakico un masterclass? Na Aruba Pro Lechi Mama ta master riba tereno di lechi materno. Pro Lechi Mama tin un trayectorio di 20 aña brindando informacion y sosteniendo tur mama cu kier y a scoge pa duna nan yiu pecho”, Kock a expresa.

El a subraya tambe cu den cifranan nan por a nota cu desde cu Fundacion Pro Lechi Mama ta activo na Aruba e cifranan di lechi materno a casi triplica, pero mas cu esey, nan tin dos experto como instructor e instructornan den e masterclass aki.

“Nos a diseña e masterclass aki di tal manera cu tur esunnan presente lo sinti nan mes empodera cu e conocemento nobo cu nan lo haya y p’esey e titulo Empower your Breastfeeding Journey”, el a remarca.

Kock a subraya cu durante e masterclass lo pone atencion tambe ariba e ley di lactancia materno. Fundacion Pro Lechi Mama mes a pusha pa e ley aki a drenta na vigor y e ley ta existi pa 15 aña caba na Aruba. Sinembargo, Kock a comenta, cu nan ta ripara cu ainda tin hopi confusion rond di con pa aplica e ley aki tanto den e parti di e doño di trabou como e trahado.

El a splica cu e ley no ta intencional pa duna e mama mas ora liber ni tampoco pa perhudica e trabou. E ley ta pa duna e mama cu ta dunando pecho e oportunidad pa interumpi su trabou y tuma pauzenan cortico cada dos of tres ora pa e por duna pecho of pomp. Si e mama no haya e oportunidad aki, e produccion di lechi ta bay atras y e mama por bira malo. “Nos lo splica precies con pa tuma e descansonan pa beneficio di e mama y di e baby sin perhudica e trabou”, el a agrega.

E breastfeeding masterclass lo tuma luga diasabra awo dia 3 di september di 8or di mainta te 12or di merdia. E tin un 75 florin pa persona of si e mama trece un acompañante e ta prijs ta bira 100 florin. Pa mas informacion por subi riba e pagina di Facebook di Fundacion Por Lechi Mama.

Minouche Lopez, experto den lactancia materno un di e oradornan di e masterclass, a splica cu e tema cu e ta bay papia mas riba dje durante e masterclass ta kico ta lechi pecho. Tur hende sa cu e ta blanco y e tin cu sali di e pecho, Lopez a enfatisa, pero tin full un trayectorio su tras. Con e proceso ta bay, con e ta wordo traha, kico mester tene cuenta cune, ki posicionnan mester pone e baby, ki otro opcionnan tin, kico ta alimentacion terapeutico, otro manera pa duna boter y asina tin hopi otro aspecto cu e mama ta haya cune durante e proceso di duna pecho.

“Ora cu bo ta lesa di e tema, bo ta bisa waw, eigenlijk mi no sa nada y bo ta sigui lesa pa bo siña mas. Den e les ki nos ta purba enfoca riba tur e parti cu tin di haber cu duna lechi pecho pa duna e mamanan un bon base pa nan mes por duna nan yiu pecho”, el a remarca.

Durante e masterclass lo papia tambe tocante e retonan cu e mama por haya ora cu bo ta duna lechi pecho. Tambe lo toca e tema di mastitis. Segun Lopez ta indica hopi biaha nan ta tende cu ora un mama ta duna pecho e pechonan ta yena hopi, e ta haya dolor, e kliernan ta pega y esey por bira un infeccion y hasta un absceso. Durante e les nan lo splica con ta reacciona y soluciona tip di retonan aki.

Con bo sa cu e baby ta haya suficiente lechi, kico ta e señalnan pa bo sa ki ora e baby tin hamber, entre otro. Tur esey y mucho mas lo wordo cubri durante e masterclass aki.

Tin e parti emocional tambe ora cu un mama ta duna pecho, e hecho cu prome e mama tabata un persona independiente, trahando y diripiente aworaki un persona ta depende di dje pa por sobrevivi. E tema con pa atende cu tur e situacion emocional ta wordo duna door di Laura Tromp, orador invita for di Hulanda”.

“Nos tur sa cu lechi pecho ta natural, pero e no ta bay automaticamente y e tin hopi mas envolvi den dje den e parti emocional tambe, cu alabes tin un influencia riba e produccion di lechi”, el a agrega.

Pa loke ta trata e tema di alimentacion y cuido durante embaraso y durante e proceso di duna lechi pecho, Lopez a destaca cu en berdad nan ta na altura cu tin un grupo cu ta haci uso di alcohol durante nan embaraso of durante e tempo cu nan ta duna pecho, durante e masterclass Lopes a indica, nan lo splica e parti di con pa combina un tiki alcohol cu lechi pecho. Na mesun momento el a menciona cu uso di droga naturalmente nunca ta bon y nan ta apoya esey, pero lastimamente e ta algo cu nan ta na altura cu ta tuma luga.

Loke ta alimentacion durante bo embaraso, Lopez a subraya cu eigenlijk un mama mester alimenta su mes bon, pero e baby ta bon den e bariga. Ta importante si pa semper un mama come balansa y durante cu e ta duna pecho e mester di 500 caloria extra.

“Nos sa cu ora un mama no ta alimenta su mes bon, si e no ta bebe bon e tin efecto riba e produccion di lechi. Den principio e mama mag di come y bebe tur locual cu e kier, pero tur cos cu ta di mas no ta bon”, el a finalisa.

Den e conferencia, Ana Maria Ramirez Brand Manager Pampers Aruba tambe tabata presente como un di a sponsornan pa e evento aki. “Di parti di Pampers no ta sumamente contento y agradecido na Fundacion Por Lechi Mama pa ta parti di e tremendo evento aki. Nos ta comparti e vision di Fundacion Pro Lechi Mama cu mayornan informa ta mayornan empodera pa por tuma miho decisionnan pa nan baby y nan famia”, Ramirez a expresa.

El a destaca cu nan ta aplaudi e fundacion cu pa 20 aña a asisti mayornan nobo den un periodo cu hopi cambio y di parti di pampers y su distribuidor nan ta regalando un entrada pa dos adulto pa e masterclass diasabra awo. Pa participa mester subi riba e pagina di Facebook di Compra y nomina un mama of un mayor pa asisti na e masterclass aki.