Fundacion Pro Cultura Arubiano lo tene nan obra di teatro ‘Tardecito Crioyo’ na caminda pa Dia di Himno y Bandera. E obra di teatro, cu lo tuma luga 16 di maart, lo ta pa e recauda fondo pa e fundacion por tin nan cah’i orgel.

Lilian Koolman Besselink, president di fundacion ta comparti cu e obra lo ta diferente sketch cu hoben y persona di edad halto den dje. E titulo ‘tardecito crioyo na caminda pa Himno y Bandera’ ta pa e celebracion di Himno y Bandera.

“Nos fundacion kier yega na nos propio cah’i orgel pasobra pa tin un no ta facil. Pa e motibo aki a dicidi cu nos lo haci un obra pa tur miembro, pa asina por recauda fondo pa nos yega e cah’i orgel”, el a splica.

Koolman Besselink ta splica cu e motibo cu nan a haci esaki ta pasobra nan kier hinca e muchanan den instrumento di cah’i orgel,‘algo valioso pa nos’. E ta bisa cu a comunica cu Buchi Boekhoudt, kende lo traha e caha, pero cu esaki ‘ta costa placa’.

Pa traha un cah’i orgel tin un costo di 18.000 florin y 20.000 florin pa e material nobo. Segun e trabou tin un duracion pa un aña pa traha un cah’i orgel. E ta splica cu e caha mester tin un caminda cu aire ta pasa den dje. E no por keda den calor of airco pasobra, e cilinder ta bira rondo of oval. E clabonan cu tin cu mester claba pa hinca e palonan den dje, segun Koolman Besselink ta splica, cu no ta palo cu ta obtenibel di Aruba, pero mester busca di afo.

Cada miembro a haci nan esfuerso conhuntamente cu nan famia y otro fundacion. Nan lo conta cu 16 sketch ‘tin canto, baile, poesia y comedia comico cu Shi Preke’. “Nos ta un grupo di famia cu ta dedica nan tempo na cultura den tur aspecto.”

Nan lo tin tambe un mucha homber cu problema visual presente, ken lo toca acordeon. Koolman Besselink ta bisa cu e lo ta un atardi placentero y educativo. A splica cu esaki ta e prome evento cu cuminsa cune pa asina por tin mas actividad pa por yega na e fondo cu nan mester.

E directiva nobo ta keda positivo pa nan bin cu proyecto y logra esey. “E ta manera un piano, cu no ta asina facil bo ta haya un piano y mester wak cu con ta traha cune. Tambe instrument wiri. Tur esaki nos ta dispuesto pa yega na dje.”

E ta duna di conoce cu nan tin hoben y mucha den edad mas chikito cu ken kier siña maneha e instrumentonan aki. Pa tin na cuenta cu ta instrument special y cu mester mantene e cah’i orgel. Nan a kies ‘maestro Buchi Boekhodut’ pa motibo cu el a yega di traha 10 caha.

Miembro di fundacion Pro Cultura, Hubert Geerman a duna detaye cu lo tin siguridad rond di henter area di Cas di CSultura pafo. Esey ta pa motibo cu den pasado a tuma nota cu persona tabata kibra auto pa horta.

Geerman ta splica cu a dicidi pa haci esaki pa evita situacion asina bolbe pasa. Nan lo tin 4 agente di siguridad cu lo ta pendiente for di 6:30 te cu 9:30 di anochi, ‘nan lo ta para na diferente parti unda cu auto ta parkeer’.

Janine Wester Orman tambe a pidi pa hoben y muchanan ‘hasta esunnan grandi’ aporta na e evento. “E enfoke ta e tradicion verbal, e ta bunita pa presencia kico tur nos ta bay trece dilanti cu e variedad show, musica y mensahe educativo.”

E ultimo aña, nan a ripara cu tin hopi hoben cu ta interesa participa den e festival di Himno y Bandera. E festival di cultura y nan kier sigui promove esaki. Nan kier cuminsa cu esunnan hoben pa nan tin e conocemento y sigui bay dilanti cu cultura.

“Nos fundacion ta kere den nos hoben y e talento cu nan tin. Pa e motibo aki ta pidi pa 16 di maart pueblo por presencia e diferente edad di esunnan cu lo duna show. Manera dicho ta bisa, un simia bon planta ta sembra alegria y cultiva felicidad den nos cultura.”

Antonia Hilario, kende ta pertenece na e fundacion Pro Cultura a bisa cu lo bay tin dos señora di edad cu lo conta di Aruba.