Ayera tardi fundacion Plataforma Aruba a keda introduci oficialmente, cu e meta di colabora cu tur instancia of organisacion pa desaroya proyecto nobo cu un enfoke riba nos artistanan y sector di arte contemporaneo local y cultural; pero tambe pa crea un laso mas estrecho cu comunidad di Aruba den general.
Ana Maria Hernandez ta e actual presidente di e fundacion y esun cu a bin cu e iniciativa aki. E ta un Historiado di Arte cu experiencia riba programacion artistico visual contemporaneo y educativo.
Pa inicia nan caminda riba conocemento di arte plastico y visual contemporaneo di Aruba, nan a cera un aliansa cu Biblioteca Nacional di Aruba (BNA) cu e nomber subhetivo: Arte Contemporaneo na Biblioteca. E fundacion a haya donacion di varios instituto internacional y local di publicacionnan importante di arte contemporaneo cu ta disponibel na BNA. Esaki ta compaña cu un programa di eventonan chikito basa riba e tema di e coleccion bibliografico aki. E ta un forma pa publico por familiarisa cu e desaroyo y tendencia di arte contemporaneo na Aruba.
E di dos proyecto ta tuma luga den Centro Ortopedagogico Aruba, unda hunto cu e fundacion aki, nan kier desaroya un curriculum chikito pa un grupo di hoben. Nan ta bay wak con nan por yuda den e proceso cu por afecta of influencia e hobennan nan cambio di comportacion y nan relacion cu sociedad. Hernandez ta aclaria cu esaki ta un asunto cu nan ta bay traha hunto cu e centro, y no ta cuestion cu e fundacion ta bin cu un curriculum. Sino cu hunto nan ta bay desaroya un metodologia nobo di educacion.
Di su banda, director di BNA, Astrid Britten, a expresa cu nan ta contento cu e iniciativa di fundacion Plataforma Aruba pa cu e proyecto di e bukinan di historia di arte contemporaneo. E coleccion aki a wordo poni den un sitio cu ta accesibel pa tur bishitante di BNA. Britten a bisa cu BNA ta curasha e tipo di colaboracion aki, pa asina biblioteca por dispone di e coleccion aki.
Igualmente el a probecha e oportunidad pa anuncia cu diadomingo awor lo tin un Maker Expo conhuntamente cu mas organisacion, entre otro Futura. Esaki ta tuma luga den cuadro di clausura di aña escolar 2018-2019, y inicio di e temporada di vakantie nobo. E orario lo ta for di 11’or di merdia te cu 8’or anochi. Biblioteca lo ofrece nan servicio regular. Te hasta por haci uzo di oportunidad di trece e bukinan cu a fia for di biblioteca. Ademas nan tin un campaña caminda bo ta bira miembro di biblioteca y bo ta haya un buki gratis.
