Dia 20 di juli Colombia ta celebra 213 aña di independencia y en conexion cu e celebracion aki Fundacion Petronio Alvarez Internacional y Fundacion DRECAA ta organisando un evento pa conmemora e fecha special aki.
Durante un conferencia di prensa, Vanessa Alvarez, representante di Fundacion Petronio Alvarez Internacional a extende su invitacion na henter e comunidad Arubiano y e comunidad di Colombia y Latino America na e isla pa pasa na Cad di Cultura dia 20 di juli pa asina celebra e 213 aña di independencia di Colombia.
El a splica cu durante e celebracion e comunidad ta bay tin e oportunidad di disfruta di e presentacion, cuminda y mas di e diferente regionnan di Colombia. Fundacion Petronio Alvarez ta cinta cu apoyo di Departamento di Cultura di Aruba (DCA), e Consulado di Colombia y Fundacion DRECAA cu tambe a uni cu e Fundacion Petronio Alvarez Internacional pa celebra e dia importante aki pa tur e Colombianonan
Amparo Angulo, representante di Fundacion DRECAA, tambe a extende su invitacion na henter e pueblo di Aruba, specialmente na e comunidad Colombiano na e isla pa pasa y celebra e dia di independencia di Colombia. “Nos kier invita e pueblo di Aruba, y specialmente e Colombianonan pa compaña nos dia 20 di juli pa celebra nos 213 aña di independencia,” el a remarca.
Na mesun momento Angulo a gradici tur e gruponan folklorico cu ta preparando y organisando tur cos pa e celebracion aki ta uno espectacular y inolvidable.
El a resalta cu entrada pa e evento di celebracion ta completamente gratis pa un y tur. Angulo a ratifica cu durante e celebracion ta bay tin diferente persona, y organisacion, cu ta bay presenta e cultura di Colombia y tur cu uni na e celebracion lo por disfruta di e cultura di Colombia y nan dushi gastronomia.
E celebracion ta cuminsa pa 6or di atardi na Cas di Cultura.
