E di 52 Dia di Mama Tera ta un evento global pa demostra e importancia pa proteccion di nos medio ambiente. Esey ta e mensahe di Fundacion Parke Nacional Aruba, FPNA.
“Como individuo, nos mester reconoce e impacto cu nos tin riba ecosistemanan y ahusta nos manera di biba pa por garantisa un naturalesa diverso y resiliente pa futuro.” E fundacion ta sigui bisa cu e e tema di e Earth Day e aña aki ta pa ‘Inverti den Nos Planeta’, y ta un yamada pa Gobierno y tambe sector priva pa contribui na proteccion, conservacion y sigur na restauracion di e estado degrada di nos naturalesa.
“FPNA lo sigui inverti den nos naturalesa via e diferente programanan di monitoreo y restauracion di e areanan natural protegi tanto terestre y marino pa por logra un future caminda nos ta disfruta di un naturalesa mas rico. FPNA ta invita pueblo di Aruba pa inverti den nos planeta, pasobra un futuro yena cu naturalesa, ta un futuro prospero pa nos tur.”
