Tur especie local di yerba di lama ta protegi pa ley local, ya cu nan ta forma un habitat esencial pa cantidad di especie marino den etapanan importante di nan ciclo di bida. Ecosistemanan di yerba di lama ta vincula cu especienan protegi y den peliger, manera turtuga di lama y conchi. Cantidad di especie di pisca cu ta contribui na pesca tambe ta depende riba e yerba di lama aki.
Desde cu a pone e piernan na Rodgers Beach, e yerba di lama na e luga aki awo ta mas expuesto na actividad humano. Ta curasha tur bishitante na areanan unda tin e yerba di lama pa sigura pa no trapa esakinan of crea demasiado movemento di awa, algo cu por afecta of causa daño na e yerba di lama y su especienan asocia.
Fundacion Parke Nacional Aruba a cuminsa investiga e yerba di lama den Areanan Marino Protegi di Parke Marino Aruba, den colaboracion cu Universidad di Aruba, pa agrega un aspecto practico pa studiantenan di segundo aña SISSTEM den nan les di Ciencia Ambiental. Adicionalmente, tin dos stagiere di Universidad Van Hall Larenstein di Ciencia Aplica trahando cu FPNA pa desaroya un programa di monitor yerba di lama, door di investiga e estado actual di e yerbanan di lama pa forma un baseline.
