Recientemente durante un bishita cortico, Arjan de Groene, consehero di “World Wildlife Fund Netherlands” (WWF-NL) a reuni cu varios persona y entidad clave, entre nan, cu tawata encarga cu e programa di bishita di sr. De Groene.

E enfoke ta pa mantene e islanan cu ta partner cu DCNA esta, Corsou, Boneiro, St. Maarten, Saba, St. Eustatius y Aruba, uni y conecta cu partnernan internacional. E contacto cu De Goede a wordo estableci door di Hellen van der Wal, miembro di e Hunta di Supervicion di FPNA, kende por cierto a wordo apunta recientemente como President di “Dutch Caribbean Nature Alliance” (DCNA),

Segun e comunicado cu Bon Dia Aruba a ricibi ta indica, durante su bishita, De Groene lo sondea e posibilidadnan pa conecta Aruba tambe cu e 8 obhetivonan cu ta central den e organisacion di WWF-NL, asina formando un base igual cu e otro islanan. WWF-NL ta sostene un medio ambiente sano pa tur hende, enfocando ariba un total di 8 obhetivo global cu mira pa un cambio den biodiversidad prome cu aña 2030. E 8 obhetivonan global di WWF-NL ta: “Wildlife, Ocean, Forests, Food, Climate, Freshwater, Biodiversity, Man and Behavior”.

Segun De Groene, WWF-NL ta traha principalmente riba e islanan di Boneiro, St. Eustatius y Saba, ya cu naturalesa no conoce barera mi a acepta e invitacion di DCNA hunto cu FPNA pa asina conoce diferente organisacion, persona y proyectonan na Aruba. Aunke tur isla ta diferente, e problemanan y por lo tanto e solucion na e problemanan aki ta hopi comparabel. E situacion riba tur isla encuanto coral y e poblacion di pisca ta alarmante, pa cual lo mester coordina e desaroyo economico y conservacion di nos naturalesa den un manera balansa. Nos partnernan riba e otro islanan por siña hopi di Aruba su conocemento y experticio, sin laga afo cu Aruba tambe por siña hopi di e otro islanan. Ehempelnan clave ta restauracion di flora, planificacion di Parke Marino, reduci e cantidad di plastic, colaboracion pa entre otro sondeo cientifico y hopi mas. Cu mi bishita mi ta spera di por descubri e rol cu WWF-NL por tin den e proceso aki.

Durante e luna di october DCNA lo sigui fortifica e laso entre e islanan unda cu lo tin varios presentacion y tayer na Boneiro. Adicionalmente lo tin un “Junior Ranger Exchange” organisa dor di DCNA en colaboracion cu FPNA y Stinapa, subsidia dor di WWF-NL, Rabobank, Stinapa y DCNA, unda e Junior Rangers di tur e isla lo bini hunto pa asina toca e tema di conservacion di nos bida marino y costanan.