Diabierna mainta Fundacion Parke Nacional Aruba (FPNA) a ricibi e veredicto di e caso entre Aruba Off-Road Foundation (AORF), Land Aruba, Aruba Birdlife Conservation y FPNA. Despues di un prolongacion di dos siman, hues a dicta na fabor di conservacion di naturalesa.
Na luna di mei ultimo, FPNA a introduci un plan di maneho caminda cu gradualmente lo regula e vehiculonan di motor den e area protegi di Parke Nacional Arikok, debi na e impacto halto cu e vehiculonan tin riba nos flora, fauna y biodiversidad. Esaki ta e prome paso den un serie di plan di maneho cu lo ta na fabor di conservacion y proteccion di Aruba su patrimonio natural.
Conforme e landsbesluit Parke Nacional Arikok (AB 2000 no. 59) FPNA su tarea principal ta conservacion y proteccion di e biodiversidad y area natural cu un enfoke riba flora y fauna endemico y nan balor ecologico. Un otro aspecto ta e preservacion di e componente cultural,geologico, arkeologico y historico di Parke Nacional Arikok.
E trabou incansabel di conservacion di nos naturalesa lo continua awor cu FPNA a ricibi e maneho di e areanan di reserva adicional, pa cual lo mester determina por medio di dialogo cu usuarionan, un plan di maneho a termino largo pa e areanan aki.
FPNA kier a extende su gratitud pa tur e sosten cu a ricibi pa e trabou di conservacion. FPNA lo sigui mantene comunicacion estrecho cu partnernan clave relaciona cu e maneho di vehiculo di motor y tambe traha hunto pa yega na e meta cu ta recreacion sostenibel.
