Recientemente minister di Infrastructura y Medio Ambiente a tuma nota di e cambionan den statuut di Fundacion Parke Nacional Aruba, di cual nan no a consulta cu gobierno prome cu a haci cambio esaki.

E mandatario ta bisa cu Parke Nacional Arikok (PNA) ta un fundacion cu ta independiente for di gobierno, a pesar cu nan ta ricibi mas o menos cu 2.5 miyon florin di subsidio pa aña. Nan tin e tarea specifico pa controla e Parke Nacional, e terenonan aki ta di pais Aruba. Esaki ta segun e comunicado cu nos a ricibi di minister Oduber.

Minister Otmar Oduber ta splica: “Na januari mi a haya e sorpresa desagradabel cu a pesar cu mi tabata reuniendo na varios ocasion cu directiva di PNA, mi no wordo notifica na december nan a cambia e statutonan. Nan a cambia esakinan den diferente forma cual no a carga aprobacion di gobierno na e momentonan ey. Pa cual a hasta a acudi na gobernador pa mustra nan riba e hecho cu e cambionan aki no ta aceptabel sin notifica gobierno riba e decisionnan cu a wordo tuma. PNA ta eherciendo un trabou den nomber di gobierno pa proteha casi 20% di nos areanan protegi akinan na Aruba. A sinta cu e directiva di PNA caminda cu a confronta nan e suceso di e cambionan cu a tuma luga na e statuto sin cu a consulta cu esunnan responsabel. A haya comprension cierto momento for di nan y a hiba discusion di cierto cambionan cu a tuma luga cual den mi concepto y den esun di gobierno, no ta yuda den e implementacion di e maneho cu nan mester hiba pa PNA conforme e motibo cu a apunta nan como e beheerder di e terenonan aki.”

Na e momentonan aki a pone concepto cu mester pone esakinan bek na su estado original mas pronto posibel. Bureau di minister hunto cu esunnan encarga cu PNA, ta trahando riba esaki cu adaptacionnan conforme e tempo moderno. Pero ta keda conserva e curason di e trabou cual e fundacion mester tin pa cuido di e parke aki.

Parke Nacional
Segun un comunicado cu nos a ricibi di FPNA, nan ‘meta principal ta pa cumpra terenonan priva bek’. Durante e prome encuentro cu directiva di FPNA y minister di Medio Ambiente actual, a nomina di dos miembro pa gobierno y un miembro nomina pa NGO’s.

Adicionalmente a trece un cambio den statuut pa por brinda un servicio optimal di e coffeeshop cu ta situa den e centro di bishitante na San Fuego. E cambio aki ta duna FPNA e posibilidad pa aplica pa un permiso pa por encarga su mes cu e benta di cuminda, bebida y sin laga afo e souvenirnan.

FPNA ta splica cu na december di 2017, FPNA a finalisa un proceso di cambio di statuut cu tin su inicio na 2014. A ser considera cu cambionan lo ta necesario pa por sigui efectua efectivamente e tareanan legal di FPNA esta: conservacion di naturalesa y artefactonan historico y cultural den parke, educacion di tanto diferente gruponan nacional como bishitantenan di afo, y brinda posibilidad pa recreacion cu ta cuadra cu conservacion.

Un cambio cu a wordo efectua ta cu awor statuut ta permiti FPNA pa por cumpra terenonan priva (eigendomsgrond) cu tin den Parke Nacional desde cu el a wordo funda. Doñonan di tereno priva den Parke Nacional a apela diferente biaha na gobiernonan anterior pa nan cambia tereno of pa gobierno cumpra e tereno aki bek di nan persona, pero financieramente esaki nunca tawata posibel. E meta principal cu FPNA tin tras di e cambio den statuut ta pa por cumpra e terenonan priva den parke pa asina garantisa cu nan lo wordo proteha.

Pa por cumpra terenonan priva den Parke Nacional lo mester por tin fiansa disponibel. Si esaki no ta disponibel FPNA lo mester por acerca fondonan local y internacional pa un fiansa. E statuut anterior no tabata permiti FPNA explicitamente pa fia placa. Cu e cambio aki por purba haya fiansa pa asina purba yega na acuerdo cu e doñonan di e diferente terenonan priva cu ta situa den e area di proteccion di FPNA.

Adicionalmente a trece cambio den e nomber di FPNA unda esaki ta wordo yama Fundacion Parke Nacional Aruba, ya cu e maneho no ta solamente di Arikok mas, sino di e area Ramsar –Spaans Lagoen tambe desde februari 2017. Na mesun momento a amplia e statuut pa por proteha otro areanan di naturalesa sea areanan asigna pa gobierno of areanan priva di locual doñonan ta pidi FPNA pa maneha e conservacion. E cambionan aki ta prepara FPNA pa por proteha mas areanan di naturalesa na Aruba na momento cu esaki tuma luga. A amplia statuut tambe pa por proteha flora y fauna cu no ta riba tereno di parke y si ta core peliger.

“E trabou nos dilanti no ta uno cu lo por wordo efectua den un par di dia sino den transcurso di lunanan y añanan. Conservacion di nos flora y fauna sigur ta na prome luga”, FPNA ta bisa.