Manera ya ta custumber durante temporada di carnaval diferente fundacionnan ta traha pa concientisa pueblo, sobretodo mayornan, pa cuido di nos muchanan durante e celebracion aki. Fundacion Pa Nos Muchanan (FPNM) ta un di e fundacionnan cu ta traha incansabelmente henter aña largo pa yuda e muchanan y den temporada di carnaval ta pone enfasis ariba algun punto importante pa cuido di muchanan.
Natasha Gilkes, directora di FPNM a splica durante un conferencia di prensa cu den bista cu ya caba tin diferente actividadnan carnavalesco ta tumando luga y no ta solamente adultonan ta participa na esaki, pero muchanan tambe, nan tin diferente puntonan di enfoke pa comparti pa asina percura cu e muchanan ta pasa un dushi carnaval, pero sigur.
Na prome luga, Gilkes a indica, ta sumamente importante haci e pregunta si e actvidadnan carnavalesco ta adecua pa e mucha. Por ehemel actividadnan cu ta tuma luga anochi of esnan cu ta tuma luga den dia, pero cu ta dirigi pa adulto. FPNM ta recomenda pa preferiblemente laga e mucha keda cu un adulto responsabel, sea ta na cas of un centro di cuido di mucha.
Fundacion Pa Nos Muchanan tin un lista cu diferente centronan di mucha cu ta ofrece cuido durante actividadnan di carnaval. Gilkes a remarca cu e lista aki ta un recomendacion y semper e ta keda responsabilidad di e mayor pa bishita e centro, haci pregunta, observa y despues haci un escogencia.
El a agrega cu pa yuda haci e escogencia aki mas fasil tin un lista tambe cu diferente punto di enfoke cu mester tene cuenta cune na momento cu ta busca un centro pa e mucha keda na dje.
Gilkes a splica cu si un mucha tin 4/5 aña bay ariba, cu ta e dad cu nan ta recomenda pa laga e mucha participa den actividadnan di carnaval, ta importamte pa puntra e mucha prome si e ta interesa pa participa den e actividad. Si acaso e no kier participa, e ora preferibelmente mester laga e mucha cu un adulto responsabel of e mayor por keda cas cu e mucha tambe y por haci cualkier otro actividad leuk.
Si e mucha bisa cu e kier participa den e actividad, Gilkes ta enfatisa cu tin un otro lista di punto di enfoke pa haci e actividadnan aki agradabel, pero sigur pa e muchanan.
E puntonan di enfoke ta lo siguiente: for di momento cu ta na cas aplica sunblock riba e cuero di e mucha y hiba esaki parada pa por re-aplica e sunblock; bisti e mucha un pechi of un sombre pa asina por proteha su cabes y su cara; bistie pañanan fresco, preferibelmente di catuna cu colornan cla pa e no sinti mucho calor y tambe ta hopi importante pa bistie algo comodo na su pia.
Gilkes ta recomenda tambe ora cu ta bay parada pa cana cu un parasol pasobra no semper ta lograhaya un luga cu tin sombra. Den caso e mayor no tin un trailer of un tent, e mester cana cu un parasol of busca un luga cu tin sombra pa asina e muchanan no ta para directamente bao di e solo.
El a agrega cu teniendo cuenta cu ta hopi calor, ta hopi importante pa keda hidrata. Mester bebe awa, cana cu awa of juice, algo cu lo refresca e mucha durante e actividad carnavalesco. Mester tene na cuenta tambe cu si hiba cos di come pa esaki no contene productonan cu ta daña lihe.
Otro punto importante cu Gilkes ta enfatisa ta pa purba di no perde e mucha durante parada. Esak ta algo cu lastimamente ta keda sucede tur aña y pa e mucha esaki por ta hopi dañino. “Imagina un mucha di seis aña, shete aña, of cinco aña mes cu a perde su mayor. Nos sa cu durante paradanan tin hopi aglomeracion di hende y esey por sucede cu bo ta perde bista di bo yiu. Pa preveni esaki tene bista na dje,” el a menciona.
FPNM ta recomenda tambe pa pega un papel riba e mucha su paña cu e nomber completo di e mucha, e nomber di e mayor of e adulto responsabel, un number di telefon pa asina si acaso polis of un otro persona haye, nan por tuma contacto directamente cu e mayor. Gelkis ta subraya tambe pa siña e mucha cu si acaso e perde, ken e tin cu acerca, den e caso aki polis, pa asina e por haya ayudo.
Den caso di muchanan cu ta bay wak parada, Gilkes ta splica, ta importante pa e mucha ta para patras di e baricada. No lague para mucho cerca of dilanti e baricada pasobra e trucknan ta pasa, tin hopi huma y esaki por ta dañino pa e mucha su salud tambe.
Pa loke ta trata e oido, el a recorda cu Quota Club Aruba tur aña ta traha pa concientisa cominidad tocante e importancia di bisti earplugs. “Por favor percura pa bo yiu tin earplugs. Si por cumpra esaki prome, pero durante parada tambe Quota Club ta den e diferente paradanan di mucha pa bende earplugs,” el a señala.
El a agrega cu mayornan mester siña nan yiu, papia cune prome cu e actividad carnavalesco con e mester bisti e earplugs pasobra kisas ta prome biaha e ta bay un actividad di carnaval y nunca el a bisti un earplug y kisas e lo kier kite. “Ta importante pa papia cune, splike dicon e mester bisti e earplugs pa asina e por proteha su oido.”
Por ultimo Gilkes a informa cu FPNM tin un campaña tambe, tur aña nan ta haci esaki, unda cu mayornan cu ta interesa, gruponan di mucha interesa of otro adultonan responsibel pa un of mas mucha interesa, por pasa libremente na oficina di Fundacion Pa Nos Muchanan y ricibi e folder ‘Carnaval y Mucha’. Den e folder aki tin diferente punto hopi valioso di atencion pa percura cu e muchanan ta pasa un dushi carnaval y sigur, y hunto cu e folder lo ricibi un sunblock tambe.
