Fundacion pa Nos Muchanan: Mayornan por traha un skema di actividad pa comparti cu muchanan na cas’

Durante cuarentena aki cu hende mester keda cas pa evita e plamamento di virus COVID-19, famianan mester keda cas cu nan yiu y cuminsa ripara cu e temporada aki ta pa haci uno positivo pa nan.

Natasha Gilkes di Fundacion pa Nos Muchanan a duna di conoce cu na e momentonan aki e fundacion no ta trahando for di oficina, pa asina mantene e reglanan implementa pa gobierno di shelter in place. Gilkes a expresa cu nan ta atende nan casonan via telefon 583-4247 y 588-0856. Igualmente el a afirma cu nan ta disponibel via Facebook y tambe via nan e-mail adres cu ta info@fpnm.aw.

Di mesun manera, Gilkes a menciona cu esaki ta un temporada cu ta trece hopi reto pa mayornan y tambe pa muchanan, pa motibo cu prome cu COVID-19 mayornan tabata na trabou y muchanan na scol, traimerdia of crèche. Despues di trabou nan ta pasa un tempo cu nan y pa finalisa e dia muchanan ta bay drumi. Pero awor mayoria di mayornan ta na cas y nan ta pasa tur dia cu nan yiu, algo cu ta trece hopi reto, tambe ta exigi di hopi pasenshi y creatividad di parti di mayornan.

Gilkes a bisa cu pa e motibo aki ta hopi importante – y aunke tambe ta dificil, pa via cu un gran parti di mayornan a perde nan trabou – pa mayornan haya creatividad. Di mesun manera pa esunnan cu ta yuda nan yiu cu nan les di scol of si tin cu traha for di cas, cu tambe ta trece su retonan.

“Purba di haci e temporada aki uno positivo”, Gilkes a manifesta, pa motibo cu di aki un par di aña, ora e muchanan ta wak bek por haci e pregunta, con el a pasa e temporada aki di COVID-19? Di esaki el a bisa cu por ta cu muchanan lo recorda pa bisa cu “mi a pasa hopi tempo cu mami y papi, pero e tempo tabata dushi”. Pa yega na esaki ta importante pa haci un schedule di diferente actividadnan cu por haci hunto cu nan yiu na cas.

El a expresa cu por ta actividadnan recreativo y na mesun momento tambe nan ta siña algo for di dje. El a duna di conoce cu den riba pagina di Facebook di ‘Fundacion pa Nos Muchanan’ ta publica algun actividad cu mayornan por haci cu nan yiu. Por ehemplo, traha un lista di ‘Scavenger Hunt’ y busca cosnan di diferente colo of na diferente luga cu fin educativo.

“Di e forma aki nan ta bezig na cas, pero na mesun momento nan ta pasa un rato leuk y siña algo nobo”, Gilkes a declara.

Na e momento cu tin mayornan cu tin cu traha for di cas, Gilkes a splica cu esey ta pa motibo cu mayornan mester balansa trabou, cuido di nan yiunan y tambe responsabilidad di cas. Tres cos cu mester haya un balans y cu no ta facil pa mayornan. Eynan tin cu bisa cu mester traha un skema na unda ta pone momentonan cu por dedica pa trabou, akinan mester ta honesto pa wak kico ta realisabel, alcansabel pa por haci y priorisa cierto cosnan. Ta importante pa comunica esaki pa su pareha of otro persona cu ta yuda cu e muchanan, pa asina por colabora ora e mayor ta bezig cu su trabou.

Gilkes a sigura cu mester mantene e muchanan ocupa y bisa e muchanan cu papi y mami ta trahando pa asina nan tambe ta na haltura cu mayornan ta trahando, pa muchanan chikito mester ta mas creativo.

Asina mes, Gilkes a bisa cu ta importante pa tuma un break pa haci e tareanan di cas, tempo di calidad cu muchanan, pero tambe un tiki di tempo pa su mes. Tambe mester trece dilanti cu mayornan mester palabra cu muchanan e ora cu nan tin cu drumi y asina mayornan por dedica nan tempo pa haci otro cos den cas o pa trabou.

Mayornan por usa nan tempo tambe pa wak un pelicula, haci movecion of lesa un buki y relaha nan mente, pa motibo cu tambe mester inverti tempo den nan mes, pa ta saludabel y ta e miho mayor posibel pa nan yiu.

Di otro banda, den temporada aki cu muchanan ta na cas, docentenan tambe por haya contacto cu nan pa wak con nan ta, si nan ta haci nan les, si tur cos ta bayendo bon, pa motibo cu nan tambe por haya un motivacion di parti di nan maestronan.