Fundacion pa nos Muchanan ta comparti e mensahe di conscientisacion pa asina proteha e muchanan durante temporada di carnaval. Nan tin un lista di crèche cu ta ofrece servicio tanten cu mayor ta na parada.
Pedagosisch consulent di Fundacion pa nos Muchanan, Janelle Artsen, formando parti di comision di lantamento di mucha, kier a informa cu tin un lista di crèche cu ta ofrece servicio pa e mayor cu ta participa den parada.
Artsen ta comparti cu si mayornan kier laga nan yiu den un luga, ta keda na cada mayor pa haci bishita y evalua si ta desea di laga nan yiu. Di eynan, nan por wak si nan tin’e sigur y si ta sinta mas confortabel.
“Nan por wak locual nan ta haya ta bon y asina nan por wak e servicio cu e luga ta duna. Tambe por yama y haci afspraak pa e miho dia cu nan kier pasa bishita pa asina wak e calidad di cuido”, el a splica. E ta expresa cu e ta importante pa famia wak esaki.
Un punto cu a menciona ta si tin un familiar cu no ta bay carnaval por cuida e mucha y si e mucha ta confortabel pa keda eynan, pasobra ta un persona cu e conoce y ta sinti su mes sigur. Si no tin opcion, e ora e fundacion tin e lista.
Nan lo sigui duna informacion di orario, kico e luganan ta ofrece y si tin actividad special pa mucha. Si tin mayor cu mester di e servicio, por subi riba nan pagina di Facebook y wak cua ta esun mas aplicabel pa nan, sea den area of servicio.
Pa cualkier otro informacion, nan por acerca Fundacion pa nos muchanan mes na Facebook of na 583-4247 si tin mas pregunta of tambe por yama na e crèche.
