Fundacion Pa Nos Comunidad: Ta yuda solamente esunnan asigna pa instancia local y cu papel regla

ORANJESTAD – Bon Dia Aruba a acerca Fundacion Pa Nos Comunidad pa puntra nan si ta brindando yudansa pa e Venezolanonan cu ta indocumenta riba nos isla, kendenan ta pasando den necesidad y sin cuminda.

Director di e fundacion, Gianaika van der Biezen, a splica Bon Dia Aruba cu persona ta asumi cu pa busca producto ta habri pa tur. Sinembargo, el a splica tocante con e fundacion ta traha. “Tin un maneho, nos ta cay bou un di dos liña, e prome liña ta conta pa asuntonan social, Wit Gele Kruis, Biba Bou Guia y tur otro instancia cu nos ta traha cu nan tambe.”

E instancia ta manda nan e cliente, nan tin cu yena un formulario y ora esaki keda cla, nan ta entrega. E fundacion mes ta yama e persona y ta haci un combersacion. Actualmente e fundacion ta trahando cu dos trahado social.

Durante e combersacion cu e persona, nan ta wak si el a pasa pa un trayecto caba cu instancia, si esey no ta e caso, e fundacion mes ta pasa un trayecto cune. Un stipulacion di tres luna, prome nan ta entrega un pakete di un luna, si nan ta wak e no ta realisabel den tres luna. E prolongacion ta bira pa 6 luna, maximo un aña.

E proceso aki ta conta pa e pakete basico, unda cu gran parti di producto ta wordo cumpra pa e fundacion mes. Sinembargo, Van der Biezen ta bisa cu persona indocumenta no ta cay bou di e remarca, ningun instancia por yuda nan pasobra nan no tin papelnan. Tin biaha, antes ora mucha tabata involucra, nan tabata ricibi ayudo, pero ultimo tempo, esaki tampoco ta pasa.

Ultimo tempo hende tambe tin miedo pa acerca y tampoco no tabatin control, segun e ta bisa. Ora cu el a cuminsa traha como director, pa duna forsa na e regla, e cliente tin cu duna su dato di adres (papel censo, Web of Setar) y tambe pa sa cuanto hende tin den famia den necesidad. Mester tur detaye di e persona cu ta biba den cas pa trece mas facilidad y miho control pa e fundacion y cliente nan cuminsa cu duna un carchi.

“Un cos mi por bisa, cu tin hopi Latino ta acerca, pero tur tin nan papel na ordo y tur ta pasa bou di e mesun proceso. No tin excepcion pa ningun, pasobra si haci pa un, boca ta bisa otro anto ta confronta cu un avalancha di Venezolano, anto no tin hopi pa nos cliente mes, pues e ta dificil pa haci esey”, Van der Biezen a remarca.

Den pasado, e ta corda net ora el a cuminsa traha, cu un persona a acerca cu tabata pasando hopi necesidad, y no tabata tin nada pa come. El a yud’e cu pan, a pesar cu no tabata por, el a yuda, y no e no a ripara cu e situacion a bolbe ripiti.

E situacion, segun Van Der Biezen, ta uno preocupante. “Pa dia, 500 hende ta bin pa busca pan, pasobra e ta caro, pero asina e ta. Esunnan indocumenta ta ricibi ayudo cerca nan hende cu nan mes conoce, of scondi di otro luga.”