Den un entrevista cu directora di Fundacion Pa Nos Comunidad (FPNC), señora Gianaika Van der Biezen-Marin, Bon Dia Aruba a haya e oportunidad di haci algun pregunta na señora Van der Biezen-Marin tocante e programa di noodvoedselpaket cu FPNC a tuma over for di Rode Kruis Aruba cuminsando e luna aki.

BDA: Con e proceso ta bayendo pa FPNC despues cu a tuma over e programa di ayudo di cuminda pa comunidad?

“Nos tabatin diferente desafio. Tin hende ta bisa nan a registra pero nos no ta haya datos di nan, tin hende a lubida, tin hende no a worry pa registra den e periodo menciona anto aworaki mi no por registra nan”, señora Van der Biezen-Marin a bisa.

“Nos a haya sa recientemente tambe cu a carchinan, e vouchernan, despues di dia 18 di juni mi no por lesa na ken su nomber e ta, anto esey tabata un di criterionan pa loke tabata e overname. Nos no ta intercambia data, pero si tur hende a haya un code cu ta personal na e persona cu ta haya e ayudo, y ariba e carchi ora bo scan e, e ta bisa na ken e ta pertenece, anto asina mi por a registra e personanan aki. Door cu despues di dia 18 di juni mi no por a lese mas, mi mester a para un rato cu mi screening, haal op tur e carchinan pa asina nos por sigui cu e screening, paso mi mester por wak si di berdad e ta pertenece na e persona pa evita cu e carchi ta na nomber di un otro persona cu no ta ni biba mas na Aruba”, el a bisa.

BDA: E personanan cu no a registra den e tempo stipula, tin e oportunidad di registra ainda y ricibi e ayudo?

“Te cu aworaki no. Casualmente ta algo cu mi a bolbe puntra, mi no sa si nan ta bay bolbe habrie bek pa futuro, dentro di poco ban pone asina. Te ainda e ta bisa na nos cu no”, Van der Biezen-Marin a bisa. “E no ta na FPNC pa dicidi, dus esey ta a parti fastioso, paso e no ta den nos man, pero ya esey tabata parti di e overname. Nos a purba di haci tur loke ta humanamente posibel, den sentido cu por ehempel e hendenan cu ta ciego, nos a bay te nan cas, nan a yena e formulario hunto cu nan, nos a yuda e hende grandinan, pero ya esey ta esunnan cu a acudi of comunica cu nos, of a mail nos, of un bisiña a comunica cu nos, dus loke tabata humanamente posibel den nos man, nos a hacie”.

“Nos a hasta extende, paso den principio e inscripcion tabata di dia 7 pa dia 13 di juni, nos a hasta extende un siman mas pa duna espacio na esunnan cu no a logra, cu ta traha den weekend, cu ta traha te oranan anochi laat pa asina toch por brinda ayudo pa e inscripcion. Personanan cu no por a registra online, of cu no tin internet, nos a yuda nan akinan na oficina tambe”, Van der Biezen-Marin agrega.

BDA: Rode Kruis Aruba tabata usa e sistema di carchi, voucher pa duna e ayudo, ki metodo FPNC lo usa?

“Esey a wordo cambia, nos tin cu wak tambe cu ta un ayudo e ta, e programa mes ta bisa un noodvoedselpakket, e ta bai pa e ayudo basico”, Van der Biezen-Marin a bisa. “Cerca FPNC e screening ta hopi mas streng, cu e screening nos ta purba di wak kico ta e entrada di e persona pa wak si di berdad e tin e necesidad ey, anto cerca nos e ta bira un voedselpakket cu nan ta busca na e localidad cu nan ta wordo asigna. Bo ta wak e bario unda e persona ta biba, y e fecha of orario disponibel, paso cada pakete ta wordo distribui pa dia y orario, dus grupo grupo ta bai busca nan paketenan, y si nan no por busk’e nan mes, nos ta bay hiba nan”, Van der Biezen-Marin agrega.

BDA: E programa di noodvoedselpakket ta di gobierno cu ta bai via FPNC, gobierno di Aruba ta esun cu ta duna FPNC e fondonan necesario pa por hasi e programa aki posibel?

“Si, te ainda e ta wordo pasa via un subsidio special, dus no ta Hulanda ta financia e programa te ainda”, señora Van der Biezen-Marin a bisa. “Mi no sa si esey lo cambia, pero actualmente nos ta ricibiendo e placa for di gobierno di Aruba, no di Hulanda”.