Fundacion Pa Nos Comunidad cu pakete pa famia afecta pa pandemia

Fundacion Pa Nos Comunidad lo tin nan pakete pa personanan/ famia cu a keda afecta, sea perde trabou of cualkier situacion cu ta confrontando cune pa motibo di Coronavirus.

Gabriel Marchena di e fundacion a duna di conoce cu nan ta haya mas peticion, tocante e cantidad el a comenta cu ‘e ta grandi’. Nan ta trahando cu diferente instancia social cu ta duna servicio na nan cliente. FPNC kier informa comunidad cu nan a introduci nan ‘COVID voedselpakket’ destina pa e situacion cu ta confronta awo. E cuminda ta pa esunnan cu ta meld cu tin necesidad. Nan ta traha normalmente cu Departamento di Asunto Social, FCCA, Wit Gele Kruis cu nan casonan conoci. Tambe pa por yega na e pakete mester cumpli cu cierto rekisito.

Marchena a splica cu pa cay na remarca pa ricibi e pakete, mester tin prueba di e famia of cliente cu a sufri directamente cu e situacion actual di COVID, sea un carta di retiro, payslip of e pago final.

Nan fundacion ta basta activo dunando e ayudo necesario pa alivia e situacion. Nan ta bisa tur hende pa no drenta den panico, ‘no mester pasobra tin hende ta papia hopi y esey ta trece panico’,

E fundacion ta yudando a base di peticion cu ta haya. Nan ta conta cu sosten di CEDE Aruba, sosten di comunidad solidario, Heart leadership Foundation cu ta recolecta combustible y producto basico – manera aros, bonchi, tuna, cornflakes, hariña, papel wc – pa asina e perosna por alimenta su mes.

Nan ta conta tambe cu sosten di comunidad cu kier yuda den e momentonan aki. Pa tur esunnan cu mester mas informacion por yama na helpdesk 280-0707. Nan a habri un liña di comunicacion pa cliente por yama directo pa melding di COVID-19.

Mester yena un formulario y mester pone adhunto e prueba di cliente cu a sufri consecuencia di perde trabou hunto cu e rekisitonan pa demostra efecto cu ta pasando aden. Nan ta pidi comunidad di Aruba uni pa yuda persona cu mester, cu cualkier donacion.

“Hunto nos por logra mas pa combati e problema cu tin y trece alivio na cas di famia. No ta situacion cu ta pasa aden diariamente, pero ta sumamente importante pa yuda. Ta contento cu a ricibi sosten di hotel, restaurant y compania. Tur donacion ta hinca den pakete pa por amplia mas pa cliente haya alimento pa nan y nan famia”, Marchena a expresa.