FHMDD (3).jpg

Cada dia Fundacion pa Hende Muhe den Dificultad ta mira mas violencia y e consecuencia cu esaki tin pa hende muhe. 20 aña nan ta trahando sin psicologo mientras tin un necesidad grandi. Pero ta falta fondo.

 

Coordinador di Fundacion pa Hende Muhe den Dificultad Magaly Maduro ta splica Bon Dia Aruba:“Actualmente nos tin un necesidad grandi den un psicologo. Nos no tin un den nos fundacion mes pero nos ta trahando riba dje si. Esaki ta algo cu nos a ripara cu ta algo cu nos mester di dje. Lamentablemente esaki ta algo cu ta trece cierto desafio mirando cu entre otro ,e personanan cu tin basta aña cu e fundacion cu awor ta mayor di edad porta no a wordo atendi riba e problemanan cu nan por tin.”

 

Esey tambe ta un fase segun Sr. Maduro caminda cu e personanan aki awor ta trahando famia pero kisas no a surpasa e problemanan cu un psicologo lo seguramente por a yuda nan cu ne.

 

Hoben y adulto

Fundacion pa Hende Muhe den Dificultad mester di un psicologo no solamente pa e muchanan of hobennan cu ta acudi cerca nan pero seguramente tambe pa e hende muhe. Trahado social cu ta traha cu FHMDD, Maria Carrasquilla ta splica cu un dama cu a sali for di un relacion abusivo ta tuma un tempo anto sinembargo despues ta bolbe cay den un otro relacion abusivo. “Nos por yuda te na unda cu nos por. Pero si bo tin añanan largo ta sufri den un relacion abusivo esaki ta demanda ayudo di un psicologo. A pesar cu bo por sali di dje, haya cu tur e forsa y informacion con cu bay bin bo mester di e ayudo aki pa bo no enfrenta e mesun situacion den un otro relacion.” Esaki no ta pasa den tur caso pero ta asina cu den mayoria di e casonan cu Sra. Carrasquilla a trata, e por a ripara con cierto cosnan manera esaki ta keda bin bek.

 

Falta di fondo

E motibo number uno pakico e fundacion aki ta operando sin un psicologo ta pa falta di fondo, asina coordinador Sr. Maduro ta splica Bon Dia Aruba. “Pero nos sa cu nos por comparti cu otro instancianan cu tambe tin necesidad di un psicologo anto asina bo por parti e gastonan.”

Esaki ta den planificacion pa den corto plaso busca un solucion pasobra e tin su consecuencianan hopi grandi segun FHMDD. “Nos ta mira hopi violencia eyfo, e problema cu criminalidad anto parti di e origen ta esaki. Pues e problemanan cu bo tabata tin na cas of den nan hubentud cu no a wordo enfrenta na tempo. E tin su consecuencianan pa hopi añanan y p’esey nos mester purba yuda awo y no ora cu ta hopi laat caba.”