Fundacion Orguyo Aruba ta bringa y promove un sociedad diverso y inclusivo na Aruba. Un lucha cu e fundacion ta hiba desde 2019, aña cu e fundacion a wordo funda oficialmente. Durante un conferencia di prensa diaranson atardi presidente di Fundacion Orguyo, Bruce Ponson a elabora riba e lucha di e fundacion y deseonan cu e fundacion tin pa e futuro di e comunidad LGBTQIA+ na Aruba.
Fundacion Orguyo ta bringa no solamente pa promove un sociedad diverso y inclusivo na Aruba, pero tambe pasobra esaki ta hancra den e statutonan di Aruba.
Ponson a indica cu desde 2019 nan ta trahando pa logra nan meta. E fundacion a cuminsa mandando cartanan oficial pa diferente instancianan gubernamental, Parlamento di Aruba, Gobernador y Rey di Reino Hulandes, pero tur e cartanan aki a keda sin contesta.
El a splica cu den e carta nan ta pidi pa matrimonio igualitario, reconocemento legal na e pais unda nan ta biba. Como cu nan no a ricibi ningun reaccion, na september di 2019 e fundacion a entama un caso na corte di prome instancia di Aruba contra pais Aruba y e sentencia di e caso aki a bin dia 27 di mei 2020.
Den su sentencia hues a dicta cu tin discriminacion ta tumando luga na pais Aruba y e obligacion di pais Aruba ta pa percura cu e discrimacion aki wordo ta wordo elimina y cu mester tin derecho igual na Aruba.
Ponson a sigui splica cu despues di esaki e fundacion a apela e caso mirando cu e sentencia tabata inclui un conclusion, pero nada conecta na e conclusion aki no tabatin un consecuencia legal.
E caso a sigui y a bay den apelacion dia 6 di juli 2020 y despues di esaki tabatin diferente otro cosnan cu a tuma luga, entre otro introduccion di union civil na september 2021.
Ariba dia 6 di december 2022 tabatin e sentencia di Hof van Justitie di Aruba, Corsou, Boneiro, Saba, Sint Eustacius y Sint Maarten caminda a sentencia cu Aruba mester duna acceso na parehanan homosexual pa por casa mescos cu parehanan heterosexual.
Ponson ta remarca cu esaki tabata e meta desde dia uno di Fundacion Orguyo y nan purba pa laga e sentencia aki keda e sentencia final y pa no bay den Cassatie, pero dia 24 di feburari 2023 pais Aruba a anuncia cu nan ta bay den Cassatie pa loke ta e sentencia di Hof van Justitie.
Dia 10 di november proximo ta tuma luga e caso den Cassatie na Hoge Raad na Hulanda. Fundacion Orguyo a ricibi invitacion y lo ta biahando pa Hoge Raad na Hulanda pa asisti e caso den Cassatie.
“E ta masha particular cu Hoge Raad a haci un openbaare mondeling handeling di un caso, pero nan a mira e necesidad pa esaki y como tal a invita nos pa ta den persona durante esaki,” el a resalta.
Ponson a señala cu nan a tuma nota cu ultimo tempo na Aruba tin hopi negativismo contra diferente instancia y persona y rond di e topico aki. El a resalta cu Fundacion Orguyo ta trece pa dilanti ta cu semper mester corda cu ta trata di sernan humano cu sentimentonan real y lo unico cu nan ta desea ta pa nan por forma y comparti un bida hunto bao proteccionnan cu constitucion di Aruba ta brinda caba .
“No ta un invento, no ta algo nobo nos ta pidiendo. Unico cos cu nos ta pidiendo ta igualdad y cu e constitucion cu ta brinda e derechonan aki ta brind’e na nos tambe,” el a enfatisa.
Pa loke ta e deseonan di e fundacion, el a resalta cu Fundacion Orguyo lo kier mira un comunidad cu tin sosten social pa miembronan di specificamente e comunidad LGBTQIA+ cu tin cualkier dificultad, cu tin cualkier problema of duda, un sosten cu lastimamente no ta existi na e momentonan aki.
“Den nos opinion e ta bay yuda hopi si por tin visibilidad, tolerancia y aceptacion den comunidad pa cu miembronan di nos comunidad y personanan cu ta convivi hunto,” el a remarca.
Pa e motibo aki Fundacion Orguyo a tuma e decision di organisa un ‘Diversity Walk’ caminda den harmonia, paz y trankilidad nan lo comparti un atardi hunto.
Ponson a subraya cu e caminata no ta bay tin ningun meta adicional, “unicamente nos kier duna visibilidad na e comunidad, specificamente LGBTQIA+. Nos lo kier pa e visibilidad aki resulta den tolerancia y aceptacion di personanan cu ta forma parti di nos comunidad.”
