Cada luna di juni comunidad di LGBTIQ+ ta rindi homenahe na e “Rebelion di Stonewall” cu a tuma luga dia 28 di juni di 1969 na New York, un evento cu a yuda haci impulso di e movemento moderno pa e lucha di e derechonan di personanan homosexual.

Pa e motibo aki y mirando cu awe ta dia 28 di juni, Bon Dia Aruba a tuma contacto cu Fundacion Orguyo pa asina ey haya informacion mas reciente di loke nan ta bin haciendo, kico a pasa cu e tratamento di ley di matrimonio di mesun sexo y e diferente eventonan cu ta bin haciendo rond di e isla pa conmemora e “Pride Month.”

Den un combersacion cu Bruce Ponson Jr., ken ta fungi como presidente, y Egmar Irausquin, ken ta secretario di Fundacion Orguyo, nan a bisa cu esaki ta e luna cu e comunidad LGBTIQ+ ta para pa nan derechonan.

Pa loke ta trata e ultimo trayecto di tratamento di e ley di matrimonio di mesun sexo, Ponson a sigura cu esey no ta den nan man ya cu ta algo politico, pero nan por a compronde si for di contactonan estrecho cu nan tin cu hendenan involucra, cu e ley ta den proceso di manda pa parlamento, den sentido cu e ta pasando den trayecto legal pa e por ser trata den parlamento.

Ademas, parlamentario di Fraccion 21 Miguel Mansur, ken ta un di e personanan involucra den iniciativa aki, a menciona na redactor di Bon Dia Aruba cu tur pregunta di verslag ta contesta. Nan ta wardando partido Raiz contesta nan pa nan ser entrega y procede cu e debate na parlamento caminda esaki no tin un fecha specifico den agenda.

Di esaki, Ponson a sigura cu nan ta duna apoyo na e proposicion di e ley aki na unda e lo logra nan metanan den otro manera cu nan caso di e cual por recorda cu Gobierno di Aruba a bay Casacion na februari ultimo pa apela e punto caminda Gobierno ta sigura cu “Corte a sinta den stoel di un Gobierno, ta importante pa haya claridad si e forma con Corte a duna contenido na e ‘rechtsvormende taak’, ta corecto,” manera Gobierno a indica den un comunicado di prensa.

Ponson a comenta cu nan tin contacto estrecho cu nan abogadonan na Hulanda y den sentido aki e documentonan a ser manda na unda nan ta wardando un fecha oficial di Hoge Raad pa por haci un tratamento di esaki publico unda e cinco hues di Hoge Raad na Hulanda lo kier wak representante di Fundacion Orguyo como tambe di e pais pa trata e caso den casacion.

Segun indicacion, esaki por tuma luga entre october cu november di e aña aki y despues di esey lo cuminsa cana e procedura final cu lo ta na momentonan cu nan lo duna e sentencia, cu segun Ponson nan expectativanan ta bay ta pa nan gana e caso y pais Aruba no tin posibilidad di bay na un Corte mas halto, “pero si acaso nos no gana na Hoge Raad nos ta sigui na Europees Verdrag voor de Rechten van de Mens (EVRM) unda nos si por sigui mas leu cu Gobierno y nos lo bay exigi nos derechonan.”

Pero kico tin matrimonio civil cu no tin den union civil?

Pa esaki, Egmar Irausquin a contesta cu “den matrimonio no tin nada, e veredicto cu nan ta wardando ta pa habri matrimonio existente pa parehanan di mesun sexo, pues tur loke ta den matrimonio manera e ta awor, hacie posibel pa parehanan di e mesun sexo, pues no ta un matrimonio apart ni tampoco nada nobo.”

Geregistreerd Partnerschap (GP) tabata un adaptacion di algun ley di matrimonio, pero e verschil grandi di GP ta cu tempo pasa a haci e opcion di cua parti si y cua parti no ta hinca den ley di GP. Pa e motibo ey, GP no ta duna pareha nan derechonan esencial.

“E tempo ey parlamento a purba gaña hende cu algo cu no ta un alternativa igual, manera e Corte di Europa ta pidi. Si bo no ta acepta pa duna bo hendenan matrimonio, bo mester duna nan un alternativa cu tin e mesun nivel di ley,” el a bisa.

Ademas, el a agrega cu “matrimonio tin diferente ley. Y loke Fundacion Orguyo a gana su caso ta pa habri e matrimonio pa pareha di mesun sexo. No ta cambia ni añadi mas ley na matrimonio. P’esey e meta di Orguyo semper tabata pa tin trato y derecho igual. E derecho cu abo tin, ami tambe mester tin. Nos tur como ciudadano di e isla aki. Y cu esaki no tin nada di haber cu bo background religioso of no, pasobra esey tambe ta un derecho di un y tur.”

For di aña 2019 cu e fundacion aki a cuminsa, den ultimo añanan, incluyendo esun di pandemia, nan a purba di duna atencion na e minoria aki cu ta LGBTIQ+ na Aruba. Ponson a sigura cu mas iniciativanan, boluntarionan y personanan ta keda contribui caminda tur aña e luna di juni ta un celebracion y e biaha aki no tabata un excepcion. Por a mira diferente actividad, cu diferente evento educacional y di entretenimento loke ta duna e atencion necesario na e periodo aki.

A medida cu tempo ta transcuri, nan ta comenta cu comunidad ta involucra un tiki mas unda cu den e diferente evento tambe tabatin dos na Cas di Cultura un cu entretenimento y otro enfoca riba e parti educacional. Ponson a sigura cu “tabata hopi interesante, debi cu no tabatin publico grandi pero e publico tabata necesario pa tin tur atencion, proceso y struggle cu e comunidad ta haya den nan adolescencia y hasta den edadnan mas halto oranan ta dicidi di bin afo, kico ta negativismo cu e fase ey ta bin cune. Tabatin psicologonan, hende di Famia Planea, dokternan y a duna atencion na personanan transgender den e parti emocional y medicinal. Tabatin hopi faceta pa e comunidad cu masha tiki bo ta wak tur esey hunto na Aruba pa nos como minoria, sigur ta hopi importante.”

Igualmente, e fundacion a duna un bonbini na un miembro nobo cu ta Julian Torres Rivas, un dokter oncologo di radioterapia y tambe nan a gradici comunidad pa apoyo y sosten den luna aki.

Parehanan di mesun sexo na paisnan como Aruba, Corsou y Sint Maarten ta enfrenta varios problema practico, incluyendo dificultad pa haya vivienda y seguro. Esaki debi na e rechaso di e paisnan aki pa matrimonio di mesun sexo na unda secretario di Estado Alexandra van Huffelen a acepta e rechaso di gobiernonan di e islanan aki bisando cu “durante ultimo lunanan, mi a tene discusionnan riba e asunto aki cu prome ministernan di e paisnan Caribense. Maske mayoria di e combersacionnan tabata constructivo y empatico, na e momento aki, no tin suficiente boluntad pa habri matrimonio pa pareha di mesun sexo. Esaki ta lamentabel, pero considerando e autonomia di e paisnan, mi opcionnan pa actua ta limita.”