Fundacion Orguyo Aruba a manda un comunicado di prensa ayera na unda nan a informa cu nan a tuma nota di algun video cu ta pasa rond, cu ta ilustra mal comportacion di algun turista cu a bin Aruba riba barco crucero den siman.
Di esaki, nan ta señala cu “Orguyo ta condena y distancia di tur comportacion cu ta contra leynan penal di Aruba. Como tal ta lamenta e sucedido cu algun di e turistanan di e barco crucero a causa. E comportacion di algun no ta refleha e normanan di e gran mayoria den e comunidad LGBTQI+.” Condenabel tambe, ta e mal uso di algun persona y organisacionnan, pa usa mal comportacion di algun, pa demonisa henter e comunidad LGBTQI+. Nos sa cu den tur parti di nos sociedad actonan castigabel ta tuma luga, y cu e personanan cu comete esakinan mester carga e consecuencia cu esaki ta trece cune. Esaki ta conta igual pa hetero, LGBTQI+, rasa, religion. afiliacion politico y tur otro denominacion cu por ta existi. No por usa actuacion di algun, pa trece tur hende cu ta pertenece na un denominacion den luz negativo. Ta lamentabel cu mal comportacion di algun ta wordo usa pa sigui fomenta odio contra di e comunidad LGBTQI+. Homofobia, stigma y discriminacion contra personanan LGBTQI+ por afecta e salud y bienestar di e comunidad aki negativamente,” e comunicado a indica.
Pa e motibo aki, nan ta señala cu “na luga di fomenta odio contra un parti di nos sociedad, ban traha riba un Aruba inclusivo na unda tur hende por biba den harmonia cu otro y por yega na desaroya na nan mayor potencialnan.” E documento a finalisa.
Di otro banda, tambe por a tuma nota di un otro comunicado di un parlamentario cu segun por a compronde esaki no ta prome biaha cu un barco crucero di comunidad LGBTIQ+ ta bin Aruba, loke ta nifica cu e ponencia di lidernan religioso unda cu ta haci sugerencia di cruceronan di e tipo aki no bin Aruba mas no ta na su luga, ya cu mas cu dies aña pasa tambe a bin un otro crucero cu turistanan di e comunidad aki cu a bin disfruta di e isla, solamente cu e aña aki tabatin mas actividadnan y nan bishita a bira mas popular, aunke e actonan di ‘algun’ di nan sin generalisa, a laga hopi di desea.
