E dia di ayera e Fundacion Operation Christmas Child a haci entrega di regalonan den un Fiesta di Pasco cu a wordo haci na Scol Mi pret’i Wowo na Tanki Lendeert.
Bon Dia Aruba a entrevista Sra. Fatima Vernier miembro di e fundacion y el a duna di conoce cu Operation Christmas Child ta e proyecto di Pasco mas grandi di e mundo, baho e organisacion cristiano evangelico Samaritan’s Purse y nan tin como obhetivo ofrece alegria y speransa pa e muchanan cu tin mas necesidad.
Sra Vernier a splica cu e fundacion a naci desde e aña 1993 na Bosnia, durante e guera un persona a cuminsa reparti regalo pa e muchanan cu a keda despues cu e guera a pasa, “esey tabata un forma di trece evangelio pa nan” y door di esey Franklin Graham misionero Cristiano Evangelico cu awo ta presidente di Samaritan’s Purse a haya un herment pa e por trece e palabra di Dios pa e muchanan.
El a bisa cu un coordinador di Fundacion Operation Christmas Child na stranhero a tuma contacto cu e persona cu ta coordinador na Aruba y cada miembronan di e fundacion tin un funcion den dje.
El a expresa cu Fundacion Operation Christmas Child ta un fundacion sin fin di lucro, 154 pais ta colabora cu tur e regalonan cu e muchanan ta ricibi, ta existi persona na otro pais cu sa di e proyecto aki y nan ta haci donacion di wega, paña, sapatonan, tur cos cu ta revisa prome pa e fundacion pa despues nan lo por hinca den un baki di plastic of caha di sapato y despues nan ta haci e entrega pa e muchanan.
Sra Vernier a bisa cu desde 1993 mas di 100 miyon di caha di sapato a ser entrega pa e muchanan na 130 pais di e mundo. Tambe a splica cu e Fundacion Operation Christmas Child ta haci entrega di regalo enter aña, pa 2019 nan tin varios proyecto na Aruba, nan ta duna training pa e personanan lo por sa di kico ta trata e proyecto, con nan lo por haci e presentacion di evangelio y con nan lo por acerca pa e muchanan, tambe a recorda cu tur e religion ta bonbini.
Sra Gianna Koolman Gerente di e Scol Mi pret’i Wowo a expresa cu e ta sinti hopi gradicimento pa e fundacion pa motibo cu e lo kier haci un fiesta di Pasco pa e muchanan pero e presupuesto tabata hopi cortico, despues el a haya contacto cu Sra Fatima di e fundacion y door di esey e dia di ayera e muchanan a ricibi su baki di regalonan.
“Mi no por a kere, pasobra pa mi ta un cos cu no tabata pasa berdad”, sra Gianna a splica.
Tambe a comenta cu “mi ta sinti hopi contento, hopi emociona, ora cu e muchanan a habri e regalo tur nan wowo ta bira grandi y e historia cu e fundacion a conta tambe tabata hopi bunita”.
