Fundacion Muchila Creativo a wordo funda na aña 2003, cu 18 aña di exsitencia e fundacion ta para pa hopi mas cu arte. Directora di e fundacion, Sra. Rose-Marie Provence, hunto cu docentenan Sra. Emerita Emerencia y Sr. Rudberth Wolff, a elabora ariba kico e trabou di e fundacion ta actualmente y kico e meta di e e trabounan aki ta. 

Fundacion Muchila Creativo ta un fundacion di arte y e obhetivo ta pa desaroya arte den comunidad Arubano, arte y cultura di e forma mas amplio posibel. Nan ta haci esey pa medio di lectura-, tayer-, y cursonan y esaki nan ta haci den e areanan di musica, arte visual, baile, teatro, multimedia y literatura, hopi mas amplio.

E fundacion ta traha pa tur edad, mucha, hoben y adulto. Sra. Provence ta conta cu durante e 18 añanan di existencia di e fundacion nan a haci hopi proyectonan grandi cu hendenan local pero tambe hunto cu hendenan di diferente parti di mundo cu a bin Aruba unda cu nan a organisa hopi proyectonan educativo pa muchanan di scol cu tambe a wordo presenta na cas di cultura.

El a splica cu durante e ultimo ocho añanan e fundacion a enfoka hopi ariba proyectonan pa hoben riba tereno musical, cu tambe tabata enofca ariba e tereno social y emocional. “Pa medio di un musical nos a laga e hobennan expresa, hobennan cu tin problema y cu nan por expresa nan mes mas miho via arte”, Sra. Provence a bisa. “Nos a bay un scol unda cu e hobennan a siña alrededor di un tema na unda nan ta den un dicsiplina y nan a desaroya nan mes y na final nos a haci un musical, y esey nos a haci durante casi 8 aña”.

Sra. Provence a splica cu Muchila Creativo tin diferente pilar, nan tin e pilar unda cu nan ta ofrece tayernan y cursonan, nan tin un pilar cu ta e musicalnan cu nan ta haci y banda di esey nan tin e pilar cu ta e terapianan cu nan ta haci, terapia di musica, terapia creativo caminda nan ta combina musica cu teatro, cu pintura.

“Dos aña pasa nos a haya un peticion di mayornan cu a puntra si nos por haci pa hobennan special un programa di arte y asina nos a ofrece un aña un programa di arte na unda e mayornan a wak den un tempo hopi cortico con nan por a expresa. Nos a haya hobennan cu autismo cu nan no tabata wak bo ni comunica cu bo y aworaki den un paar di luna pa medio di arte nos a wak con nan a cambia y e ora nan a puntra aña pasa na juni 2020 si nos por cuminsa un curiculum di enseñansa. Nos a pense, y nos tur ta docente, dus pa e parti ey a bay un tiki mas fasil, pero pa bo lanta un scol ta trece su rekisitionan cune pero nos a bisa laga nos purba”, Sra. Provence a splica.

Segun el a sigui splica, ora cu e hobennan aki nan sali for di scol Duna un Man, no tin voortgezet special onderwijs pa e hobennan, tin ta haci enseñansa na cas y tin ta bay Sticthing Verstandelijk Gehandicapten Aruba y e ora nan ta bay hunto cu esunnan adulto. Aña pasa, den dos luna Fundacion Muchila Creativo a prepara y na september a cuminsa oficilamente cu nan prome aña escolar.

E fundacion a cuminsa cu e lesnan cu un klas di no mas cu ocho mucha, “nos a bisa nos no ta tuma mas pasobra nos ta para pa calidad y no cantidad y eigenlijk e ta mas individual pasobra cada hoben tin mas atencion. Aki nan no ta sinti nan mes cu nan ta na scol, nan ta sinti cu nan ta un famia, tur ta yuda otro”, Sra. Provence a bisa. Despues di un aña di prueba nan a wak kico a bay bon y kico mester  mehora y e aña aki nan haci un adaptacion y a cuminsa cu un klas nobo.

Fundacion Muchila Creativo ta un arts based school, locual Sra. Provence ta splica kiermen bo ta nan ta usa arte pa desaroya tur e hablidadnan di e muchanan. Sra. Emerencia ta splica cu tur mainta e ta duna un les di meditacion prome cu e alumnonan cuminsa nan dia.

“E muchanan aki ta bin di tur sorto di ambiente, nos no sa kico nan ta bin cune for di cas, dus nan mester ta trankilo. Prome cos cu nan ta haci ta ora cu nan yega nan ta bin serca mi den e local di teatro. Nan tin full nan rutina, cual nan sa masha bon, nan ta coy nan mat nan ta bay drumi abou cu musica relahante, nos tin lusnan special tambe, y pa 15 minuut nan ta djis hala rosea. “Despues di 15 minuut, despues cu nan lanta, lora mat back nan ta cla pa cumisna nan dia”.

Sra. Provence a splica cu e alumnonan ta sigui un programa online, bou di guia di un docente, caminda nan ta haya wiskunde y idioma, mientras tanto e otro grupo ta haya les di skirbi y lesa. E alumnonan di segundo aña tin nan ta yama ‘leerwerk trayect’, na unda nan ta siña diferente habilidadnan y diferente materia cu ta yuda preparanan pa nan stage. E alumnonan di segundo aña ta cuminsa stage na december y gradulamente e dianan di stage lo wordo aumenta di un pa tres biaha den siman pa asina por prepara alumnonan pa nan por para den comunidad of nan por desaroya pa bay den enseñansa mas halto.

Despues di nan curiculum di enseñansa, Sra. Provence ta splica, nan ta caba cu un disciplina di arte, sea ta baile, teatro, arte visual, musica, y actualmente e alumnonan nan ta siñando con pa toca percusion pa asina logra e meta di tin un drum band di hobennan special.

Recientemente e alumnonan di Fundacion Muchila Creativo a sigui curso na Enseñansa pa Empleo unda cu nan a ricibi nan diploma di curso. Sr. Wolff, docente tambe na e fundacion, a elabora ariba e proposito di e curso aki.

“Enseñansa pa empleo a ofrece pa duna curso na nan nivel pa haci bartending, waiter/waitress, pa pone mesa, cosnan basico pero pa nan e ta den nan a habalidad y capacidad cu nan por haci.  E ta great tambe pasobra nan ta sali bay un caminda, haci un training y nan ta sinti nan ta logra algo cu pa nan ta sinti bon y ta stimulanan pa siña. Enseñansa pa Empleo a haciele hopi bon, e maestronan a tuma tur nan pasenshi pa siña nan. E muchanan tabata den e les, nan tabata pasa tres ora largo y nan no sa mes cu nan tin cu pause ni nada, nan tabata den dje. E curso a dura 4 siman y den vakantie nan a bay haal in dos dia tambe, dus eigenlijk e tabata un curso di seis siman”, Sr. Wolff a splica.

Fundacion Muchila Creativo ta haya hopi importante e participacion di alumnonan, unda cu nan mes ta bin cu iniciativa y e docentenan ta wak con nan por hinke den e curriculum di enseñansa. “Tin biaha cas of comunidad mes no ta spera mucho di nan, pero nos a ripara cu si bo duna nan participacion y bo duna nan cierto oportunidadnan, wak con nan ta bira, aworaki nan mes ta bin cu ideanan of cos cu nan kier haci y ta bunita pa wak esey”, Sra. Emerencia a bisa.

Cu Fundacion Muchila Creativo e alumnonan ta desaroya diferente hablidadnan, cu porta nan mes no tabata sa nan tin, pero cu a traves di lesnan basico nan por desaroya otro habilidadnan cu nunca a wordo explora na scol y e alumno mes no a tabata haya e iniciativa pa desaroya esey.