Fundacion Movemento ta Bida ta un fundacion cu tin como meta yuda adultonan mayor, 60+, ta mas activo den diferente area di nan bida. Sra. Rosa Leon, Toegepast Gerontoloog y lider di e proyecto Hunto Grandi, Grandi Hunto di e fundacion ta elabora un poco mas ariba tur loke e fundacion ta haci y kico e proyectonan cu nan tin ta encera.

Adultonan mayor ta e doelgroep mas grandi cu tin aworaki na Aruba, Sra. Leon ta indica, y te cu e di dos kwartaal di aña pasa, Aruba tabata yegando casi 26 mil adulto mayor. Esaki ta significa cu e populacion di adultonan mayor ta esun cu ta birando mas grandi y en realidad ta esun cu ta dominando aworaki.

Sra. Leon ta splica cu e proyecto Hunto Grandi, Grandi Hunto ta un proyecto di Cede Aruba unda cu e meta principal pa trece e hendenan di 60 aña bay ariba mas activo den sociedad y busca wak cual ta e necesidadnan cu ta reina eyfo. Cede Aruba a acerca Fundacion Movemento ta Bida, door cu e fundacion tin diferente gruponan di 60+ activo rond di Aruba.

E proyecto Hunto Grandi, Grandi Hunto a cuminsa dos aña pasa y Sra. Leon ta splica cu prome cu nan a cuminsa cu e actividadnan, nan a haci un encuesta pa wak cual ta e necesidadnan, cuanto adulto mayor tin y a base di esey nan a saca un top cinco di actividadnan.

Un di e actividad mas grandi y exitoso, segun el a señala, ta e actividad di desaroyo continuo y digital. E meta di e actividad aki tabata pa 28 adulto mayor siña diferente cos tocante tecnologia, unda cu despues nan mester traspasa e conocemento cu nan a adkiri durante e curso, pa otro adultonan mayor

“E bon di e proyecto aki ta cu el a cay net den temporada di Covid-19 unda cu hopi hende no tabatin contacto social cu otro, y pa medio di sa con pa traha cu un WhatsApp of sa con pa busca diferente informacionnan online, e la facilita y habri porta pa e adultonan mayor cu no tabatin mucho conocemento di tecnologia digital”, el bisa.

Sra. Leon a indica cu e tabata un proyecto di tres fase unda cu a traspasa e conocemento na otro adultonan mayor y pa otro aña e proyecto lo bin atrobe, pero por ta den un otro forma, pasobra nan ta wak e necesidad door cu tecnologia ta avansando rapidamente.

Un otro proyecto exitoso cu Fundacion Movemento ta Bida tin ta un proyecto di agricultura, Hofi den bario 60+. Esaki, Sra. Leon ta splica, ta den conhunto cu Cas Shabaruri cu a duna nan un pida tereno den nan mesun tereno. E hofi a wordo inaugura aña pasa y nan a cuminsa crea un hofi unda cu tur hende cu tin interes of tin necesidad di cosecha, nan lo por usa esey pa tuma nan tempo y cosecha y traspasa conocementonan di agricultura pa otro.

“Esey ta un proyecto cu a cuminsa e tempo ey, pero ainda ta activo. Nos a wak cu e evolucion di e hofi a bira basta grandi te cu nos ta trahando den conhunto cu Rancho. Nan tabata e prome Stichting cu nos a bende casi 31 mata na prijs super barata pasobra un kier yuda otro. Nos no kier genera placa, pero nos mester bende pa nos por cubri nos mesun gastonan”, el a agrega.

Leon a enfatisa cu e hofi ta habri pa tur hende. Na principio e hofi tabata pa adultonan mayor, 60+ solamente. Pero e fundacion no kier limita un persona cu ta menos cu 60+ cu kier ta social den e parti ey y aworaki e ta un hofi cu grandi y chikito por bay y disfruta.

Pa aña nobo, Leon ta señala, nan ta bay enfoca ariba e persona mes. Ta bay tin proyectonan pa e cuidadornan tambe, pasobra tin hopi adulto mayor y tras di e adulto mayor sigur tin un of dos persona cu ta cuid’e. E meta ta pa yuda e cuidadornan tambe desaroya nan mes, nan fortalece nan y yuda nan socialisa tambe.

“Dus otro aña nos ta bay enfoca mas riba personalidad, con abo por ta fuerte riba bo mes pa bo por brinda un adulto mayor of un adulto mayor brinda un otro 60+ e calidad di bida y purba yud’e pa e por di un of otro manera ta activo den sociedad, cual ta e meta principal”, el a bisa.

“E adulto mayor di aworaki no ta mescos cu esun di 20 of 30 aña pasa y p’esey mi ta yama nos proyectonan innovativo pasobra nos ta trece innovacion den cada proyecto y innovacion kiermen actualidad. Y nos ta purba di hinca algo cu nan ta conoci cune pero na mesun momento hinca algo actual cu nan por ta actualisa cu locual cu ta pasando rond di mundo tambe”, Leon a agrega.

Pandemia di COVID-19 a afecta tur hende rond mundo, pero e grupo mas vulnerable pa e enfermedad ta e grupo di adultonan mayor. Pero esaki no a stop Fundacion Movemento ta Bida pa yuda y motiva e adultonan mayor.

“Nos prome proyecto a cuminsa den temporada di COVID-19 y e tabata un reto pasobra hopi di nan tabata den manera panico pasobra semper a bisa cu nan ta e populacion mas vulnerabel. Pero juist nos a usa e momento ey pa motiva nan y bisa nan cu nos ta den e pandemia y e no ta bay ni pa awo ni pa mañan pero what about nos traha riba dje y nos por duna nan tools nan cu nan por actualisa y keda den contacto cu otro pa no perde e contacto social den e temporada aki”, Leon a splica.

E ta enfatisa cu e no tabata facil, pero nan a haci e adaptacionnan necesario pa por a sigui ofrece nan proyectonan na e adultonan grandi.

Por ultimo Sra. Leon a indica cu Fundacion Movemento ta Bida ta motiva e adultonan mayor pa ta activo den sociedad y si tin un grupo di 10 adulto mayor cu kier lanta un grupo pa haci diferente actividadnan recreativo of social ariba nan mes, nan por ofrece e guia pa yuda nan y pa medio di CEDE Aruba nan por ofrece ayudo nan financiero pa nan por lanta nan grupo. “Esey tambe ta algo cu nos ta promove, pa bo mes ta activo cu bo mesun grupo y nos ta duna bo e push pa bo por haci esey tambe”, el a finalisa.