Ayera mainta, Lisette Gomes presidente di e fundacion Mi Voz Ta Bo Voz a haci un conferencia di prensa pa asina informa comunidad cu nan ta den buskeda di muchanan di 12 aña bay ariba cu kier participa den un fundraising relaciona cu e marathon di KLM dia 3 di juni proximo.

Esaki ta di cinco biaha di edicion di e marathon aki na Aruba y Corsou na unda esaki ta di dos biaha cu Fundacion Mi Voz Ta Bo Voz ta bay realisa e proyecto “Kids ford Kids,” e idea di esaki ta pa muchanan riba 12 aña cu ta bay scol ainda por recauda fondonan pa yuda otro mucha cu menos recurso.

E idea ta pa 50 mucha cu ta bay scol of di manera individual ta bay cana of core 5 kilometer e cual ta parti di e marathon e mesun dia cu tur e otro participantenan ta sali, Gomes a sigura cu aña pasa un di e muchanan cu a participa a gana den e categoria aki di 5 kilometer hayando su reconocemento. E muchanan ta registra oficialmente y nan ta haya nan number cu e T-shirt di e marathon.

Na final, e suma total recauda ta bay dobla, por ehemplo, si nan ta recauda 5.000 florin, nan ta haya 5.000 florin extra di parti di e aerolinea KLM y cu esaki e fundacion ta haya fondonan pa nan sigui yuda cu nan proyectonan pa muchanan contra abuso di mucha.

Te ayera, tabata falta 20 mucha pa registra manera Gomes a sigura, por ta mucha cu ta gusta cana, core of haci e deporte aki “aña pasa nos tabatin muchanan di scol y nan a cana y nan a logra nan meta,” el a bisa.

Nan participacion den e marathon aki ta gratis, nan solamente ta recauda fondo na momento cu nan ta yena un blachi y hib’e na nan famia, conocidonan of comerciante na unda nan lo skirbi cuanto kilometer nan kier cumpra, aña pasa segun Gomes a conta tabatin muchanan cu a yega recauda casi 2.000 florin nan so.

E marathon ta dia 3 di juni na unda e fundacion ta bay ta presente cu un grupo di boluntario pa cuida e muchanan hunto cu nan mayornan cu kisas tambe ta bay pa yuda y mira nan yiu participa den esaki.

“Esaki ta bon pa muchanan siña for di hoben pa ta boluntario y nan ta bay yuda e fundacion pa nan por yuda e muchanan den necesidad,” Gomes a señala.

Otro proyectonan di e fundacion

Ademas di esey, e fundacion ta bezig cu diferente proyecto na unda recientemente nan a haya un les for di e grupo di Corsou cu a bin Aruba cu e proyecto “Love & Protect Your Self”.

Na october di aña pasa e fundacion aki tabata na Corsou na unda nan a firma un acuerdo cu e Fundacion Bos di Hubentud pa tres aña manera Lisette Gomes presidente di e fundacion a sigura, tambe el a señala cu esaki tabata algo “cu a habri camindanan y portanan hopi grandi pa nos mirando cu nan ta enfoca hopi riba e parti preventivo,” el a bisa.

Nan como fundacion a haya les tambe di e fundacion di Corsou aki cu tin 30 aña di trayectorio pa un proyecto pa muchanan di kleuterschool tocante prevencion di abuso sexual di mucha y Gomes a declara cu nan ta den preparacion cu esey mirando e posibilidad di por cuminsa cu esaki den aña escolar nobo den scolnan mes.

Pa e proyecto aki mester traha e bukinan y e personahenan t’ey caba cu ta Yira y Tahino, e dos indigena aki cu e fundacion a presenta den pasado ta bay bira e dos popchi cu ta bay siña e muchanan, asina cu nan tin e proyecto cla nan lo presenta na directivanan di scolnan manera Corsou tin’e, nan ta mustra e proyecto na muchanan di tur scol di e isla ruman y informa nan e tocante e tematica aki.

“Nos sa cu esaki no ta sosodiendo di un manera masal, pero tin prevencion sosodiendo y tin biaha ora bo ta wak edadnan, e ta cuminsa for di edadnan di klas mas halto caba y nos mester ta sincero cu nos mes cu abuso sexual ta sosode for di muchanan hopi chikito y p’esey nos ta trata pa cuminsa cu muchanan chikito prome,” el a declara.

Pa loke ta trata e casonan di abuso, nan ta sigui haya esakinan pero no por bira publico sin e autorisacion di e mayornan por ehemplo, tanto pa e mucha como pa e caso mes si ta mucho complica, “mi ta kere ta bon pa pueblo ta informa, nos ta bezig cu diferente casonan pero nos por papia riba nan ainda pasobra e caminda pa cana ta un tiki dificil, p’esey e fundacion tambe kier yega asina leu pa bin cu un forma cu bo por sinta cu profesionalnan den veld pa sina kico pa haci ora bo ta haya esaki,” Gomes a bisa.

Nan como fundacion ta purbando pa sigui pusha riba e sistema, pa esaki keda den un solo linea, “pero manera hende ta wak, e cos no ta bay manera cu bo kier, pero di parti di fundacion semper nos porta ta habri ora tin un caso y nos ta guia bo y bisa bo kico pa haci.”

Nan tambe ta acerca diferente scol cu diferente tema y e muchanan ta consciente di e problema aki segun Gomes a comenta, p’esey tin biaha e casonan ta mustra mas hopi den un aña debi cu muchanan ta papiando mas lihe, antes tabata lo contrario, hende tabata keto pa berguensa, si ta famia no ta papia di esey mes, pero nan como fundacion kier kico ta pasa e caso pa motibo cu si ta laga e agresor bay y no a detene, e mayor tin cu entrega un keho.

Den ley ta para cu si un persona ta mishi cu un mucha e ta castigabel pa ley, tin cu en entrega keho pa cuminsa un investigacion cu lo tin un interogacion.

Tin otro fundacionnan manera Fundacion Respeta Mi cu tambe ta enfoca riba prevencion di abuso di mucha manera nan pero esey no ta suficiente mirando cuanto mucha y scol tin na Aruba manera Gomes a indica, “mi ta kere e mester bira algo hopi mas grandi of mester di mas iniciativa por ta di muchanan di universidad pa cera grupo, nos ta riba e caminda ey, e no ta facil, pasobra bo kier pa e cosnan por cana pa e muchanan por ta bon forma, pero mi ta kere e mayornan tambe cu ta wak kico ta pasa rond, ban pusha y papia cu boso yiunan, pa nos por evita mas abuso.”