Manera Fundacion Mi Voz ta Bo Voz ta bin haciendo for di dos aña caba conhuntamente cu KLM Aruba Marathon/KLM Royal Dutch Airlines, nan ta cla pa cuminsa busca e 50 mucha cu dia 1 di juni lo participa den e marathon di 5km pa recauda fondonan pa e fundacion.

Fundacion Mi Voz ta Bo Voz ta haci un invitacion na scolnan Mavo, Havo, scolnan priva, pa participa den e proyecto Kids for Kids, cual ta dirigi pa muchanan di 12 aña bay ariba pa asina por recauda fondonan pa yuda otro mucha cu menos recurso, e idea ta pa 50 mucha cu ta bay scol of di manera individual registra pa bay cana of core e 5 kilometer aki cual ta forma parti di e marathon mas grandi di KLM.

Lisette Gomes a sigura cu e prome aña nan a logra recauda rond di 5.000 florin y di dos aña 7.000 caminda e organisado ta dobla e cifra colecta y duna na e fundacion como fondonan pa nan proyecto contra e problematica di abuso di mucha na Aruba. Den esaki, e muchanan ta registra oficialmente y nan ta haya nan number cu e T-shirt di e marathon y si nan ta gana, manera a sucede caba nan ta haya reconocemento manera un medaya y un cup.

Riba e pregunta pakico ta ser organisa 50 mucho so, Gomes a afirma cu esey ta debi na loke nan por carga y ta un marathon pa adultonan tambe unda hopi hende ta asisti “mi ta supone cu esey ta lo cual nan presupuesto ta duna pasobra nan ta provee tambe T-shirt special pa e muchanan unda tin un meeting agreed y despues di esey tin un entregamento di check, mi ta kere cu ta pa evita hopi mas gasto y pa nan enfoca mas tanto riba loke ta e recaudamento di fondo.”

E coremento ta bay tuma luga den area di Palm Beach pero den proximo dianan nan lo duna mas informacion na e muchanan pa motibo di e meeting agreed cu lo tin na cuminsamento cu sacamento di potret, ademas Gomes a informa cu e grupo di muchanan no ta sali mesun ora cu e otro coremento regular, sino 15 pa 20 minuut despues y nan mester haya confirmacion pa cierto puntonan for di e organisacion ainda.

Segun Gomes, Colegio Arubano, Maria College, De Schakkel Aruba a yega di manda un grupo di mucha pa participa den edicionnan anterior, igualmente gruponan di atletismo y muchanan individual tambe tin e oportunidad unda su mayor por registr’e via e-mail: mivoztabovoz@gmail.com

Nan participacion den e marathon aki ta gratis, nan solamente ta recauda fondo na momento cu nan ta yena un blachi y hib’e na nan famia, conocidonan of comerciante na unda nan lo skirbi cuanto kilometer nan kier cumpra, segun Gomes a conta, den pasado tabatin muchanan cu a yega recauda casi 2.000 florin nan so, despues nan ta presenta e blachinan aki na e organisado pa asina check tur entrada cu nan a haya.

E marathon ta dia 3 di juni na unda e fundacion ta bay ta presente cu un grupo di boluntario pa cuida e muchanan hunto cu nan mayornan cu kisas tambe ta bay pa yuda y mira nan yiu participa den esaki.

“Esaki ta bon pa muchanan siña for di hoben pa ta boluntario y nan ta bay yuda e fundacion pa nan por yuda e muchanan den necesidad,” Gomes a señala.

Luna di april dedica na prevencion cu charlanan den diferente districto

Importante pa recorda cu na luna di april, e fundacion aki a haci diferente actividad pa loke ta trata prevencion di abuso di mucha, den esey, dia 30 di April nan a cera e luna di prevencion y conscientisacion cu nan ultimo charla na MFA Savaneta.

E dia ey nan a recorda e angelitonan den shelo Rishandroh y Eugene, nan ta un di e motibo nan cu nan ta sigui lucha pa proteccion di e muchanan, nan a duna un danki na tur persona cu a acudi e dia ey y tur e otro dianan, na famia Anastacia pa acepta nan invitacion, un danki special na Drs. Mitsy Willems, Drs. Melva Croes Yanez, Magaly Maduro, Omaira Britten y un danki special na nan boluntarionan y miembro nan di Comision Nacional di Abuso Sexual di Menor.

Na Aruba, manera ta conoci hopi mucha ta sufri di diferente tipo di abuso tanto fisico como emocional, tambe tin algun di nan cu ta sufri di abuso sexual na unda ta importante pa para keto den luna di april y sigui enfoca riba prevencion.

Durante e luna aki comunidad tabatin e oportunidad di compromete nan mes pa preveni cualkier forma di abuso di mucha, Estado, Gobierno, scolnan, misanan y tambe gruponan religioso mester haci nan parti, cada persona por aporta den e tarea di prevencion.

Y manera di por haci esaki ta pa involucra mas den esfuersonan di prevencion basa den comunidad, busca informacion tocante con pa preveni abuso y mantene e muchanan mas sigur, un ehemplo di esaki ta e diferente fundacionnan como Fundacion Respeta mi of Fundacion pa Nos Muchanan of e mesun Fundacion Mi Voz ta Bo Voz.

Mayornan mester proteha nan mesun yiu, tambe por apoya esnan cu ta bira victima di abuso infantil, crea mas empatia, siña e otronan tocante prevencion di abuso di mucha y reporta algun sospecha di abuso infantil.

Den ultimo aña, e topico aki a bin dilanti un poco mas door di kibra e taboo cu tabata existi, no ta nifica cu ta existi mas casonan di abuso sino cu e victimanan ta papiando riba nan situacion, manera Fundacion Mi Voz Ta Bo Voz a señala den un conferencia di prensa.

P’esey ta importante pa sigui enfoca riba prevencion y papia cu muchanan pa por tuma e medidanan necesario na momento cu algo por sucede.