Fundacion Mi Voz ta Bo Voz: “Aworaki e prioridad ta e parti di prevencion”

Durante reunion cu formadornan di gobierno, Gerlien Croes (Futuro) y Mike Eman (AVP), presidente di Fundacion Mi Voz ta BoVoz, Lisette Gomes, a trece dilanti puntonan di prioridad y preocupacion di e fundacion relacion cu e tema di abuso di mucha y abuso sexual di mucha. Den su declaracion na prensa Gomes a elabora tocante kico e puntonan aki tabata.

Gomes a splica cu durante e reunion e fundacion a vocifera nan preocupacion y puntonan cu mester mehoracion. Fundacion Mi Voz ta Bo Voz tin 15 aña trahando riba e tematica di abuso di mucha y abuso sexual di mucha y e punto di atencion primordial cu nan a presenta ta cu mester traha masalmente riba e parti di prevencion di esaki.

El a sigui splica cu como fundacion nan ta traha den e area aki boluntariamente ya pa 15 aña y nan ta kedando cla cu un proyecto, pa cual el a indica nan mester ta cooperacion di gobierno y e directivanan di scol pa por cuminsa drenta e scolnan pa yega directamente na e muchanan pa duna nan e informacion necesario pa preveni abuso, sobretodo actonan di abuso sexual.

“Nos a duna tur nos puntonan, kico nos ta bezig cune, pero tambe nos preocupacionnan como presidente di e Comision Nacional di Abuso Sexual di Mucha pa cu e cambionan cu mester bin den e sistema pa mehoracion tambe pa ora casonan presenta,” el a remarca.

Pa loke ta e trabou cu e comision a bin ta eherce ultimo añanan, Gomes a splica cu pa mas o menos dos aña a haci un investigacion basta pisa riba locual ta full e sistema. El a menciona cu ta papiando di mas o menos 100 stakeholder, incluyendo Corte, KPA, Ministerio Publico, Departamento di Asuntonan Social, entre otro, pa haya sa kico nan ta haci y kico por mehora.

Di e investigacion aki, el a sigui splica, nan a saca un rapport di mas cu 200 pagina, cual nan a presenta na Gobierno di Aruba. E fundacion a duna tambe su recomendacionnan y e analisis tambe di e rapport cu ta duna gobierno un idea di kico ta e cambionan cu mester bin, cu ta inclui, entre otro, ta e parti prevencion cu pa aworaki ta prioridad pa e fundacion. “Ya tin hopi aña trahando riba e parti curativo y aworaki e prioridad ta e parti prevencion y nos ta mira cu otro instancianan y fundacion tambe ta riba e mesun liña,” el a agrega.

Contestando pregunta di prensa tocante si e cantidad di casonan di abuso a subi of baha den ultimo temponan, Gomes a indica cu no por bisa cu exactitud pasobra no tin un structura ni protocol pa cu esaki. El a sigui indica cu den e rapport ta mustra cu dentro di 2019 cu 2023, tres diferente instancia clave den e casonan di abuso sexual cada un tin un cifra diferente di e cantidad di casonan.

“Ainda mester traha riba e parti aki, nos ta en espera aworaki di gobierno nobo pa wak kico e decision ta di kico e protocol ta bay bira, e liña pa cana ora cu tin caso y con ta bay registra esakinan tambe,” el a remarca.

Respondiendo otro pregunta di prensa, tocante si Fundacion Mi Voz ta Bo Voz tabata mas activo antes prome cu a uni pa forma parti di e Comision Nacional di Abuso di Mucha, Gomes a indica cu nan a traha hopi aña cada biaha e mesun pensamento y a yega ora pa bolter esaki y enfoca den e parti prevencion. El a remarca cu nan a haya un oportunidad hopi grandi pa por drenta e sistema y tambe cera un tipo di cooperacion cu e instancianan cu antes tabata wak e fundacion como enemigo pasobra nan ta grita.

“Bo keda grita y bo no busca solucion bo no ta yega na nada. Nos a presenta hopi punto di cambio, entre otro den e Departamento di Husticia, loke ta polis pa ora di atende cu e casonan aki, Departamento di Asunto Social y ainda tin hopi cambio pa bin,” el a subraya.

El a remarca cu cambionan no ta sucede di awe pa mañan y nan ta tuma su tempo, no solamente den e parti di ley, den e parti di protocol, pero e parti di e persona tambe. “Pa hopi aña bo a traha riba un manera y ora bin cu cambio, e por bira un tiki dificil, pero mi ta kere tur hende ta dispuesto pa coopera pasobra e ta pa e proteccion di e muchanan,” el a agrega.

Gomes a splica cu nan ta cay bou di prome minister y aworaki recientemente tin un MB nobo pasobra nan a amplia esaki como e Comision Nacional di Abuso Sexual di Mucha en general pasobra nan ta relaciona un cu otro, pero keto bay e fundacion ta atende caso, guia mayornan y yuda nan cana e camindanan legal pa nan por tin un caso mas suave, pasobra falta hopi den comunicacion entre instancianan, y tambe nan ta compaña e mayornan corte y despues ta analisa con e casonan ta bay.

El a menciona como ehempel e caso cu recien tabata den corte di e docente acusa di abusa di un alumno cu aworaki a ser apela. El a señala cu nan ta guia y documenta tambe kico por bay miho.

Por ultimo, a puntra si e idea ta pa nan pa sigui traha bou di e proximo prome minister como e Comision Nacional di Abuso di Mucha na cual Gomes a contesta cu esey ta depende di e gobierno nobo, pero el a remarca cu como Fundacion Mi Voz ta Bo Voz na semper lo keda traha. El a indica cu nan no ta publica e casonan pa privacidad di e muchanan, por ehempel, y tin mayornan ta pidi esaki tambe adelanta pa motibo di berguensa entre otro, pasobra 99% di e casonan ta pasa den famia.

“Nunca nos no a bay, semper nos a keda. Diferente casonan ta drenta pero jammer genoeg ta casonan hopi bieu por ta hopi biaha no tin prueba y eynan ta caminda nos kier yega, pa muchanan papia mesora cu algo chikito mes por pasa nan pa nos por preveni lo peor. E trabou nunca ta bay caba pasobra bo no ta bay caba cune na un 100%, pero mi ta kere nos por miho door di haci e prevencion pa por baha e casonan,” el a subraya.