Fundacion Mi Voz Ta Bo Voz a logra recauda fondo pa nan proyecto pa preveni abuso sexual di mucha

Fundacion Mi Voz Ta Bo Voz (FMVTBV) a tene un conferencia di prensa ayera mainta pa informa comunidad cu nan a logra recauda e cifra di 12.470 florin den e evento di Kids for Kids, e marathon di KLM organisa pa muchanan di Aruba.

Lisette Gomes, presidente di e fundacion, a sigura cu d 50 mucha a participa en marathon aki, den categoria di canamento y coremento di 5 kilometer. Cu esaki e muchanan a logra recauda e cifra di 6.235 florin y KLM a duna e mesun cifra aki, loke na final a bira un suma di 12.470 florin cu por yuda e fundacion cu su proyectonan specialmente prevencion di abuso di mucha.

“Cu esaki nos tin planea e proyecto cu ta dirigi na muchanan di kleuterschool pa prevencion di abuso sexual di mucha,” el a bisa.

Na maart ultimo nan a trece dilanti e proyecto “Love and Protect Yourself” cu tabata e prome aña cu nan tabata duna esaki na Maria College MAVO pero esaki tabata dirigi pa muchanan di 12 aña pariba, pa asina nan por siña proteha nan mes den e manera di self defense pero tambe mentalmente nan por ta prepara ora cu nan ta haya nan mes den e situacion aki.

Na mesun momento cu e proyecto aki tabata tuma luga, e mesun ekipo di Bos di Hubentud di Corsou a duna na miembronan di FMVTBV un training di un siman pa e proyecto dirigi na muchanan di kleuter y nan por cuminsa prepara nan si nan mester haya nan mes den un situacion di abuso sexual.

“Mirando cu na Aruba nos tin prevencion pero pa hopi biaha e ta pa edadnan mas halto, manera semper mi ta bisa, jammer pasobra tin cu casonan ta cuminsa for di 0 aña caba y mi ta kere nos tin cu bira e ball y siña nos muchanan for di chikito pa conoce nan curpa y pa nan papia for di trempan pa nan evita lo peor,” Gomes a expresa.

Aña escolar a caba y Gomes a señala cu e casonan di abuso nunca a stop, nan ta mustra cu nan ta bira mas hopi debi cu muchanan ta papia mas, e fundacion mes tin como 13 aña aproximadamente full ariba e tema aki, tabatin otro fundacionnan caba existente cu ta papia riba e tema pero Gomes ta considera cu nan a kibra un tabu hopi grandi na Aruba, otro instancianan a lanta, otro gruponan a haci manifestacion, mayornan tambe a cuminsa papia cu nan yiu.

“Y esey ta mustra cu casonan a bira mas hopi pero den nos bista no ta esey, sino cu muchanan a cuminsa papia, pero nan ta papia ora ta laat y e meta principal ta aworaki pa nos bringa yega na e parti di prevencion cu lo cual pa nos ta e solucion riba e tematica aki pa asina cu prome biaha cu cualkier cos chikito cu bay robes cu e mucha, e por papia y bisa su mayornan of maestro di scol cu algo ta pasando.”

Aworaki nan tin cu caba di rondaf a proyecto aki pa por presenta na directivanan di scol y tambe na gobierno pa asina nan por haya e portanan habri debi cu no ta un tema facil pa nan por drenta den un scol y yega cerca e muchanan, si esey no sucede, Gomes a manifesta cu nan tin nan plan B pa duna e proyecto aki na un otro luga cu por ta un centro di bario caminda nan por invita mayornan pa participa cu nan yiunan.

“E ta hopi dirigi na muchanan di 4 pa 5 aña, hopi facil pa nan compronde y e ta bay por medio di popchinan pa nan por compronde over di nan curpa y nan por compronde ora un situacion ta bay robes.”

E fondonan cu nan a caba di ricibi di e evento ta bay yuda nan cu e comienso di e proyecto aki y ta depende di e demanda di scolnan kico ta e gastonan cu nan por bay tin, pero si den caso lo falta mas financiamento, nan lo acerca comunidad, comerciantenan of instancianan cu tambe por yuda.

Gomes a sigura cu esaki ta e di dos aña cu nan ta haci e evento aki na unda par di aña pasa nan a acerca door di KLM di Corsou pa haci e evento y asina yuda e fundacion den cualkier proyecto cu nan por tin.

Danilo de Freitas den representacion di KLM pa Aruba, Boneiro y Corsou a sigura cu nan ta hopi contento pa di dos aña cu nan por participa tambe den fundraising di e Fundacion Mi Voz Ta Bo Voz unda muchanan hoben a core y cana hopi bon logrando un suma basta bon cu nan a dobla e cifra, “nos ta spera cu otro organisacionnan tambe lo por contribui pasobra e ta un tema hopi fastioso y tristo, cu un tabu grandi pero conscientisacion ta algo cu ta hopi importante,”el a expresa.

Nan ta di pensamento cu conscientisacion por yuda y hendenan ta bay papia mas di dje, abuso ta algo cu a keda unda cu muchanan hasta a muri debi na esaki, p’esey e tabu mester kibra y esey ta e motibo principal di con nan ta participa den proyecto aki y nan tin e plan pa sigui apoya e tipo di iniciativa aki den futuro.

“Adopt a Child for Back to School”

Di mesun manera, Fundacion Mi Voz Ta Bo Voz a informa tocante nan otro proyecto e cual ta trata di yuda mas mucha cu ta posibel pa nan haya loke nan tin mester pa bay scol back, aña pasa nan a logra yuda 250 mucha cu uniforme di scol, keds, underwear, tas cu tur producto den dje.

Pa personanan interesa di adopta un mucha, e tin un costo di 175 florin y nan lo ricibi tur loke a menciona caba por yama na e number di telefon 562.9820 of tambe via nan Facebook page.

Ademas, el a bisa cu nan ta planea pa bin cu lease cu tin di haber cu finanzas, con pa handle placa, con pa sali dilanti y duna hende e push cu nan mester, cu esey nan kier acerca comunidad di Aruba, comerciantenan y tur persona cu kier yuda nan mirando cu schoolgeld tambe a subi e aña aki y ta haci un tiki mas dificil e situacion financiero en general cu ya caba ta dificil e costo di bida na Aruba y nan forma di yuda e aña aki ta e Back to School.

E meta segun Gomes ta nan por yuda entre 200 cu 250 mucha, un biaha nan a logra 400 pero mirando u e situacion no ta facil nan kier sigui yuda algun mucha pa nan por haya un ‘fresh start’ y p’esey nan ta acerca comunidad di Aruba pa nan yuda cu e Back to School aki di aña 2023.