Algun luna atras mundo a conoce e pelicula ‘Sound of Freedom’, un pelicula cu a yama hopi atencion y cu na hopi pais, pa motibo di e contenido di esaki, a wordo prohibi pa pas’e. Durante un conferencia di prensa ayera, Devin de Veer di The Movies Aruba hunto cu Lisette Gomes, presidente di Fundacion Mi Vos ta Bo Vos a anuncia nan partnership pa e estreno di e pelicula aki na Aruba.

“Nos ta contento cu despues cu nos a lucha basta nos por a haya e pelicula aki pa estren’e dia 31 di augustus. E pelicula a haya un acogida masal mundialmente y na Aruba tambe e interes ta super halto y nos a haci nos maximo esfuerso pa haya e pelicula na Aruba pa nos por estren’e den nos cinenan.” de Veer a indica.

‘Sound of Freedom’ ta un pelicula cu ta basa riba un historia real di un agente federal cu ta rescata un mucha homber for di un red di traficacion di mucha. Despues cu e ta haya sa cu e mucha homber su mucha muhe ainda ta den man di e delincuentenan aki, e ta bandona su trabao y ta bay Colombia pa asina rescata e mucha muhe, y decenas di otro mucha cu tambe a cay den man di e red di traficacion y abuso di mucha.

De Veer a splica cu mirando e storia y contenido di e pelicula, nan tuma e decision pa partner cu un fundacion y asina nan a opta pa partner cu Fundacion Mi Vos ta Bo Vos.

Pa por yuda e fundacion por cumpra un ticket pa wak e pelicula ariba e dia di estreno. E ticketnan tin un costo di 35 florin cual ta encera e entrada, un popcorn y un bebida y un parti di e suma aki lo bay pa Fundacion Mi Vos ta Bo Vos pa asina nan por sigui haci nan trabao pa yuda Aruba pa loke ta trata e situacion di abuso contra mucha na Aruba.

Lissette Gomes, presidente di e fundacion a splica cu Fundacion Mi Vos ta Bo Vos ta bayendo pa 14 aña caba cu nan ta enfoca ariba e tematica di abuso sexual di mucha y abuso di mucha en general.

“En berdad e pelicula aki ora bo wak e trailer e ta hopi impactante y e ta touch e parti cu nos ta bisa ta taboo na mundo henter over di e tema aki cu pa añas no kier papia di esaki mirando cu na Merca na diferente estado a prohibi e pelicula. E pelicula tin partinan cu a sucede na Colombia y na Colombia tambe el a wordo prohibi pasobra mi ta kere hopi hende no kier papia di e tema pa busca solucion,” Gomes a remarca.

El a sigui splica cu Fundacion Mi Vos ta Bo Vos tin hopi aña ta papia y traha ariba e parti preventivo y e biaha e fundacion ta preparando un programa specialmente pa muchanan di kleuter, edad cuater y cinco aña, pa asina nan por ta alerta ariba e tema aki pa asina nan por papia trempan pa evita cu algo por sucede cu nan.

Na maart ultimo e fundacion a trece pa dilanti e proyecto “Love and Protect Yourself” cu tabata e prome aña cu nan tabata duna esaki na Maria College MAVO, pero esaki tabata dirigi pa muchanan di 12 aña pariba, pa asina nan por siña proteha nan mes den e manera di self-defense pero tambe mentalmente nan por ta prepara ora cu nan ta haya nan mes den e situacion aki

Den luna di juli na final di e aña escolar Gomes a señala durante un conferencia di prensa cu e casonan di abuso nunca a stop, nan ta mustra cu nan ta bira mas hopi debi cu muchanan ta papia mas. E fundacion ta bay cumpli 14 aña enfocando ariba e tema aki, tabatin otro fundacionnan caba existente cu ta papia riba e tema, pero Gomes ta considera cu nan a kibra un taboo hopi grandi na Aruba, otro instancianan a lanta, otro gruponan a haci manifestacion y mayornan tambe a cuminsa papia cu nan yiu.

“Y esey ta mustra cu casonan a bira mas hopi pero den nos bista no ta esey, sino cu muchanan a cuminsa papia, pero nan ta papia ora ta laat y e meta principal ta aworaki pa nos bringa yega na e parti di prevencion cu lo cual pa nos ta e solucion riba e tematica aki pa asina cu prome biaha cu cualkier cos chikito cu bay robes cu e mucha, e por papia y bisa su mayornan of maestro di scol cu algo ta pasando,” el a resalta.

Parti di e donacion di parti di The Movies Aruba lo yuda e fundacion finalisa e proyecto pa muchanan di kleuter pa asina nan por cuminsa y purba drenta e scolnan y siña muchanan tocante abuso di mucha.

Pa e estreno di e pelicula, Gomes a menciona, e prome sala cu a habri, funcion di 8or di anochi ya ta full bendi caba. Debi na esaki a habri otro dos sala, un funcion 5or di atardi y e otro 7:15 di anochi, cual ta casi full bendi caba. Por contact Fundacion Mi Voz ta Bo Voz via nan Facebook page, na nan number di telefon 5629820 of por acerca e miembronan di e fundacion pa cumpra ticket.

“Nos kier invita e comunidad di Aruba pa bin wak e pelicula. E ta un ‘eye-opener’ pa tur hende sa kico ta pasa eyfo. Nos kier bisa cu danki Dios na Aruba nos no conoce secuestro di mucha pero e ta asina cerca di nos cu nos tin cu cuminsa traha adelanta pa nos no yega asina leu y asina demostra mundo henter cu Aruba ta para contra abuso di mucha y specialmente abuso sexual di mucha,” Gomes a enfatisa.