Fundacion Lisette Gomes Stop Abuso Sexual di Mucha, actualmente Mi Voz ta Bo Voz, ta celebra 11 aña

Señora Lisette Gomes a lanta Fundacion Lisette Gomes Stop Abuso Sexual di Mucha 11 aña pasa y recientemente pasa over na e nomber Mi Voz ta Bo Voz cu e intencion di no solamente yuda e victimanan di abuso sexual, pero muchanan y mayornan cu ta den necesidad. 

Oficialmente Sra. Gomes a lanta su prome fundacion dia 5 di augustus na aña 2010, un paar di luna despues cu el a cuminsa cu e lucha y a ripara cu e sistema tin hopi buraconan den dje cu no ta yuda famianan of mayornan cu nan yiunan ta pasa den situacion aki.

E ta splica na principio e la lanta e fundacion pa cera e buraconan y haci e caminda mas facil, pa tin un solo liña pa cana e pasonan legal cu mester tuma, pa entre otro haci un denuncia, pa e victima por haya su revision di dokter cu esakinan, y tambe e tempo ey caba nos tabata pensa cu e ley nan tabata hopi suave den e sentencianan cu e huesnan tabata duna, pero tambe guia y ta un sosten pa e mayornan cu ta pasa den esaki. Ta momentonan hopi dificil cu bo ta pasa den dje anto hopi biaha bo no tin e sosten of hende no ta compronde”.

“Pero principalmente pa kibra e tabu. E tabata algo cu ora bo tabata papia di dje na aña 2010 bin ariba, hopi hende tabata mane sinti inconfortabel, nan no kier papia di e tema of nan ta keda keto, sea pa miedo, berguensa of pa algo cu nan tambe por a pasa den dje den pasado y cu nan no kier papia erover”, Sra. Gomes a bisa.

Sra. Gomes ta sinti cu actualmente si tin progreso a wordo haci ariba e tematica aki, specialmente den comunidad. “Nos a haci un investigacion y ainda tin buraconan cu mester wordo cera pero hopefully cu tur e plannan cu nos a scucha cu tin, esaki por drecha”, el a bisa. “Den comunidad tambe nos a ripara, ya nos por bisa cu casonan no a baha, pero si muchanan ta papia. Dus muchanan ta papia e momento cu cosnan ta pasa cu nan, nan ta papia mas lihe y awo nos ta mas open di e tema, mi ta kere hopi mas hende ta consiente, hopi mayornan ta papia cu nan yiunan erover, dus pa mi esey ta un cambio hopi positivo paso e meta final ta pa e mucha por proteha su mes y evita pa esaki por pasa”.

E buraconan, y problema mas grandi cu tin den e tema aki ta pa prueba e abuso sexual. “E palabra di un mucha hopi biaha no ta suficiente pa sostene locual e mes ta bisa cu a pasa cune, dus e ta hopi dificil, un persona mester ta pendiente porta si e mucha a contabo mes, abo ta bira un testigo na e momento ey, dus comunidad mester ta consiente di esey cu un mucha confiabo, abo ta bira un testigo pasobra e mucha a contabo”, Sra. Gomes ta splica.

Un punto cu mi tin cu Sra. Gomes ta bisa e ta contento toch ta  cu tin un programa aworaki  pa sex offenders cu ta cay bou di Stichting Reclassering cu e personanan aki tin cu volg y hues ta pone den e sentencia. Pero toch e ta sinti cu mester bin mucho mas pa e parti di e personanan aki cu ta comete e actonan aki. “Mester por tin un siguimento, pa wak con nan ta actua y ki ayudo nan mester si nan mester mas ayudo psicologico of psikiatrico, depende ki problema nan tin, dus mi ta kere esaki ta bay man den man”, e ta splica.

Sra. Gomes ta enfatisa cu prevencion ta e arma mas poderoso cu tin aworaki y cu e ta den man di henter comunidad pa yuda cu esaki. “E ta toca tur hende mane mi ta bin ta bisa e ultimo tempo aki. E ta toca nos tur pa nos preveni esaki pa papia erover pa bin cu cambionan, dus e no ta un hende, un ley, mi ta kere e ta full e comunidad y mi ta kere cu esaki nos por yega hopi leu pa drento di un paar di aña, si nos tin proyectonan di prevencion, cu e lo yuda hopi mas pa baha e casonan”, el a bisa.

Fundacion Mi Voz ta Bo Voz Recien tin paar di aña ta organisa nan proyecto di back to school. Aña pasa tabata esun mas grandi pa e fundacion Sra. Gomes ta splica, caminda nan a yuda 300 mucha. E aña aki e fundacion a organisa e proyecto atrobe y e ricibi un gran registracion di mucha cu mester ayudo.

“Nos a haya un registracion e aña aki di 500 mucha cual ta hopi mes. Registra oficialmente na Fundacion pa nos Comunidad nos tin mas o menos 800 mucha den necesidad y nos a haya registro di 500, dus ainda nos ta bezig ta colecta e donacionnan. E campaña ta bayendo si pero no mesun bon cu aña pasa. Mi sa nos ta den un tempo hopi dificil, nos ta den e aña di recuperacion y awo vooral e casonan subiendo atrobe, pero nos ta haci un yamada na comunidad di Aruba, te cu dia 12 di augustus nos ta keda colecta pa asina nos por bay selecta e muchanan cu ta den mas necesidad pa nos por yuda nan cu nan articulonan di scol”, el a agrega.