Manera ta conoci siman pasa tabatin un caso di un famia cu tabata pasando den necesidad. Fundacion Lisette Gomes a duna un update tocante yudansa cu a haya rond di Aruba y cu tin mas famia ta saliendo cu mester ayudo.

Lisette Gomes a duna di conoce cu for di siman pasa mes cu a comparti e situacion cu un famia tabata haya su mes den dje a ricibi respuesta lihe den comunidad, e reaccion di hende tabata positivo cu den un dia a cera tur cos pa e señora.

Gomes ta bisa cu di un banda ta contento pa motibo cu e señora su cas ta den condicion. Nan a haya compania di bentana y porta pa wak e cas y delibera den kico nan por yuda. Tambe un grupo di hotel a yuda cu articulo pa e cas.

“Nos ta sumamente contento cu e respuesta. E push cu a duna pa por yuda hende den necesidad y cu problema emocional ta bunita pa mira. Esaki ta algo cu ta aporta hopi na un persona cu problema di depresion cu tin speransa ey for. Team di e fundacion ta contento y awo hende ta keda yama pa yuda nan. Tambe tin cu menciona cu ora un caso asina bin dilanti, mas caso di famia ta keda sali, pero ta atende esunnan cu ta mas urgente”, el a expresa.

Tin caso di pensionado cu mester cualkier material y placa no ta yuda. E fundacion ta haya ayudo di tur forma pa nan por keda stabiel y trankil.

Pa locual ta trata e famia den necesidad, un compania priva a tuma contacto cu e señora, kende lo tin cu haci test pa e trabou nobo. Pa asina e por tin su trabou na tempo completo pa asina e por ta riba su pianan bek.

Sinembargo Gomes ta bisa cu nan ta haya caso di persona cu mester yudansa, den cualkier situacion na nan cas, of persona di edad cu no tin famia. E ta bisa cu nan no por yuda den tur caso. Den e temporada hende ta haci cambio den nan cas cumpra, articulo pa nan cas y pa nan por haci donacion cu nan articulo bieu di a forma ey por contribui na otro.

‘Orguyo y berguensa ta haci cu no ta pidi ayudo.’
Tin dos factor segun Gomes, dicon persona ta yega cerca nan en bes na instancia concerni. E ta comparti cu hopi Arubiano tin berguensa of orguyo. Nan no kier hende haya sa cu nan tin problema dificil of cu nan no tin cuminda. Nan ta prefera keda keto, segun Gomes.

Pero ta importante pa pidi yudansa y mas si tin mucha chikito involucra den e situacion. E di dos factor cu e ta splica ta cu instancia ta tarda y tin persona cu ta comete eror den bida, tambe e instancia ta haci demasiado pregunta.

“Esey ta pone cu ta tarda asina largo pa duna yudansa. Anto nan ta prefera acerca fundacion manera nos. Maske nos ta haci nos investigacion. Nos tin nos trahado social cu ta papia cu e persona. Nos no ta yega na ken cu ta pero haci’e cu mil amor. Pero ta pidi pa tur hende yuda cu curason, sin husga. Ban yuda ta un ser humano miho. Cu cualkier cos cu yuda asina sea un saco di aros, yuda y bo ta hay’e dobbel”, e ta expresa.

Gomes a bisa cu por contact pa cualkier na nan Facebook di e fundacion of por yama na 562-9820/ 566-1345.