Fundacion Lanta Papiamento a celebra 13 aña di oficialisacion di Papiamento

Fundacion Lanta Papiamento a organisa un actividad cultural pa celebra e di 13 aña di oficialisacion di Papiamento cu ta nos idioma materno y cu a bira idioma di Aruba hunto cu Hulandes.  

E evento bunita aki a tuma luga na Biblioteca Nacional Aruba su sede na Playa. Tambe a wordo reconoci e hecho cu 13 aña pasa Papiamento a haci su introduccion como materia di scol secundario. Alabes nan a haci reconocimento na escritornan di obranan den nos idioma materno.

Den su breve discurso di bonbini, Sr. Randy Matilda kende ta presidi e fundacion aki a bisa cu nan ta hopi contento cu Papiamento a wordo reconoci como idioma oficial. Y tambe nan ta hopi contento, ya cu nan fundacion a celebra 7 aña di existencia. 

Den cuadro di e hubileo aki, nan a organisa un anochi varia den forma di charla, canto, poesia y tambe di reconocimento di nos autornan. Tabatin un presentacion prepara pa e multi facetico y talentoso, John Freddy Montoya  den forma musical, poetico y dramatisa.  

Sr. Matilda a bisa cu bo mester “tin curashi pa cuminsa algo cu no ta oficial ainda”, el a bisa. El a duna palabra di “masha danki”  na e autornan pa e trabou cu nan a realisa y  nan ta sigui realisa di siña nos muchanan nos idioma di e forma corecto.