Den un conferencia di prensa, Fundacion Kids Rights Empowerment a splica tocante nan fundacion, nan meta pa cambio di ley pa derecho di mucha den caso di secuestro parental na Aruba.
Edmar Gietel y Jeremy Carty, ambos ta mayor cu a bin dilanti cu nan caso. Nan a vocifera hopi di con nan pareha a bay otro pais cu nan yiu. Gietel ta splica cu su yiu ta afo pa casi dos aña. El a cana su caminda, pero el a ripara cu ley no ta sostene y defende cu e mucha por wordo lanta pa ambos mayor.
Gietel a realisa cu esey no por y mester bin c’un cambio di ley, mirando cu tur otro pais rond mundo ta duna derecho na ambos mayor ora nan no ta casa, pero ta reconoce e mucha. “E lucha no ta pa nos yiu, pero pa Aruba completo, pasobra no por pasa cu otro mucha mas”, el a expresa.
E meta, segun Gietel, ta pa stop y preveni secuestro y alienacion parental. Ora cu un mucha ta ranca di un banda di famia ‘ta algo doloroso cu mester evita’, pa es motibo a pidi gobierno pa cambia ley y crea un plataforma pa haci esey posibel.
Carty tambe su yiu a wordo ranca for di dje na 2017. Su mama a hib’e vakantie y nunca mas a bin bek. El a lucha cu hues pa asina por a haya su yiu. “Mester yega na un regla cu mi tambe tin derecho.”
El a bay corte, paga abogado, sosten di famia pero no a logra. E ta bisa cu e ta haya yamada di diferente situacion casi similar. Sinembargo e ta expresa cu su yiu actual ta riba vakantie cerca dje y lo tin oportunidad di ta cune.
Janine Wever, miembro di e fundacion, ta papia di conscientisacion cu cada mucha tin derecho pa ta cu ambos mayor. “Ta importante pa enfatisa contacto, semper y cuando no ta peliger pa e mucha sino den su beneficio. Nos ta promove derecho di mucha.”
No tur tata pa ley tin e mesun derecho, si ta un tata cu no a casa cu e mama, pero a reconoce su yiu cu fam, e tata no tin automaticamente derecho como mayor di e mucha. Unico forma cu por regla esaki ta pa bay corte y regla un custodia pa e mucha. ‘E ta costa un tiki, pero ta un beneficio’.
Migracion ta haciendo su trabou di control pa cualkier mayor cu bay biaha cu menor di edad, pa mira si tin un firma. “Di otro banda no ta kita peliger, cu si no ta casa, e mama por sali cu su yiu manera a pasa den caso di Carty y Gietel.”
Prome Minister Evelyn Wever- Croes a splica detayadamente cu si un mucha nace den matrimonio, e custodia ta ambos mayor. Den caso cu divorcia, ta reparti e autoridad cu no lo afecta e mucha.
Sinembargo den caso cu no ta casa, y cu tata kier forma parti di bida di e mucha, e mama por impedi esaki, pa motibo cu henter autoridad ta bay pa e mama, a pesar cu tata a reconoce e mucha.
Pa e motibo aki mester tuma un stap y pidi custodia na Corte te ora cu ley cambia, ya cu ‘ta miho preveni cu lamenta’. “E ta costa placa, pero menos dolor cu bo yiu ta wordo kita”, mandatario a expresa.
E fundacion ta yuda den e parti di guia. Wever-Croes a splica cu no ta solamente den secuestro parental, pero tambe den caso cu un di e mayor no ta laga e yiu ta den contacto cu e otro mas. Por acerca nan pa conseho, cualkier pregunta of tambe por bay Corte paga pa e custodia.
