Fundacion Kapel di Bethania y Pastoral Hubenil Aruba ta organisando celebracion pa Dia di Rey

Fundacion Kapel di Bethania  y Pastoral Hubenil Aruba ta uni pa asina organisa un actividad pa celebra Dia di Rey e proximo 27 di april. Di e forma aki, nan kier recauda fondo pa hobennan di Pastoral Hubenil Aruba por asisti na un conferencia mundial di Papa Francisco na Portugal na juli di e aña aki.

Suzette Kelly- Boekhoudt, ken ta fungi como boluntario di Fundacion Kapel di Bethania, ayera den un conferencia di prensa a splica cu dia 27 di april nan ta realisa nan ‘Feria Familiar’ cu ta bay cuminsa for di 10.00am te cu 4.00pm. Esaki ta den cuadro di aña di celebracion di Fundacion Kapel di Bethania, unda nan ta recorda e 65 aniversario di existencia di edificio di klooster Imeldahof y tambe e 65 consagracion di Kapel di Bethania.

Pastoral Hubenil Aruba, cu ta un grupo di hoben cu ta traha pa logra nan soño di yega Portugal y por representa Aruba den un conferencia internacional, a bisa cu esaki ta un oportunidad pa nan por sigui recauda fondo pa nan biahe pa Portugal.

Reginald Winklaar, coordinado di Pastoral Hubenil Aruba a afirma cu nan ta contento di por conta cu e actividad aki cu Fundacion Kapel di Bethania ta organisa pa recauda fondo pa por bay na encuentro cu Papa Francisco, unda ta convoca hobennan rond di mundo. “E ta e evenemento di mas grandi di Iglesia Catolico,” el a sigura.

Ademas el a conta un tiki di historia na unda a bisa cu na 1983, Papa Juan Pablo a haci un misa grandi na Roma y el a keda sorprendi di tanto hoben cu a participa. For di e dia ey e idea a lanta y na 1984 el a cuminsa cu e misa di hoben cu e nomber You Believe. Despues na 1986 el a cambia e nomber pa World Youth Day na Roma y na 1987 ta e prome biaha cu esaki a bay na nivel internacional y nan a hacie na Brazil. For di e tempo ey te aworaki e nomber a keda igual.

For di e tempo ey caba Aruba ta participa den e actividad aki cu un delegacion y e aña aki nan ta preparando un biaha mas pa participa for di 21 di juli te 8 di augustus na Portugal. Esaki ta trece cune gastonan hopi grandi y esey ta e motibo di pakico nan ta recaudando fondo for di aña pasa. “Nos ta papiando di un gasto basta halto, mas o menos 5.500 florin pa persona. Den total nos ta papiando di un suma total di aproximadamente 176.000 florin, y p’esey nos ta pidi ayudo di e pueblo di Aruba,”Winklaar a sigura.

Sidney Tromp di Pastoral Hubenil di Parokia Birgen di Fatima Dakota a bisa cu nan tambe a uni na Pastoral Hubenil Aruba pa bay na e conferencia mundial aki. El a declara cu nan miembronan ta bay ta na Kapel di Bethania dia 27 di april debi cu nan tin dos actividad grandi pa e dia aki.

E prome actividad ta un caminata den bario di Noord cu ta cuminsa 7.00am cu Zumba y despues e caminata ta cuminsa y ta caba na Kapel di Bethania. Despues ta bay tin e Feria Familiar unda e hobennan ta bay yuda entretene e muchanan. “Tur famia di Aruba ta invita na esaki.”

E dia aki e hobennan ta bay ta bendiendo carchi cu ta inclui weganan tradicional cu e muchanan por haci, cushina ta bay ta bon surti y entrada na actividad ta gratis.