Ayera Fundacion Hunga Teca a celebra cinco aña di existencia y en conexion cu esaki e fundacion a tene un conferencia di prensa pa asina brinda informacion nobo tocante e fundacion y na mesun momento haci un donacion na Biblioteca Nacional di Aruba.
Shurman Milliard, miembro di directiva di Fundacion Hunga Teca, a splica cu e fundacion ta uno cu ta apoya y ta cana tras di derechonan di mucha tocante hungamento. Pa cinco aña caba nan ta duna e servicio unda mucha y hobennan hunto cu nan mayornan por bin y fia diferente cos pa hunga.
El a sigui splica cu nan ta vincula esaki cu diferente desaroyo pasobra ta importante pa sa cu na momento cu un mucha ta hunga e ta desaroya diferente aspecto den su mente como tambe motorico.
“Cinco aña pasa nos a cuminsa na YMCA San Nicolas y na e momento aki nos localidad ta Biblioteca Nacional na Oranjestad. Nos ta hopi contento cu e cooperacion cu nos tin cu nan,” el a remarca.
Milliard a indica cu na e momentonan aki nan tin mas di 250 miembro cu ta bin na e localidad di e fundacion pa fia diferente cos di hunga hunto cu nan mayornan. E trabao ta wordo realisa cu seis miembro di directiva hunto cu seis boluntario cu ta yuda den e dianan cu e fundacion ta habri.
“Nos ta hopi orguyoso cu den e cinco añanan aki nos por a keda crece pa sigui bay dilanti. E diferente actividadnan cu nos ta haci a bira mas grandi, e apoyo a bira mas grandi, e conocemento tocante e desaroyo a traves di hungamento a bira mas grandi den nos comunidad,” el a agrega.
Amelia Aguirre coordinador di Fundacion Hunga Teca a expresa cu e ta sumamente orguyoso cu e fundacion ta creciendo, no solamente den tamaño di ora cu nan tabata na YMCA San Nicolas, pero tambe cu cambio di localidad. “E exposicion y aceptacion cu nos a haya tabata tremendo,” el a indica
Hunga Teca ta realisa diferente actividad durante aña pa nan miembronan, entre otro sali keiro, bay cinema, wak luz durante temporada di Pasco y tambe bay cana den naturalesa (hike) pa mantene e muchanan activo.
Apart di esaki, Aguirre a agrega, nan tin tambe Hofi Joy cu ta situa patras di Biblioteca Nacional. El a indica cu e hofi aki no solamente ta un hardin cu tin mata, pero aworaki e ta un hardin cu ta produci cos di come tambe y muchanan ora nan ta na e fundacion nan ta haya algun les di con pa planta y con pa cosecha.
Hunga Teca a cuminsa cu weganan cu tabata donacion di reciclahe. Hendenan cu tempo di nan infancia tabata hunga cu weganan y aworaki a crece bira adulto, ta trece e weganan aki como donacion na e fundacion y asina Hunga Teca a cuminsa draai.
Recientemente Kiwanis Club of Palm Beach a haci un donacion di laptops na e fundacion cu e fundacion ta duna tambe na algun scol na Aruba. Durante e conferencia di prensa Hunga Teca a haci un donacion di tablets tambe na Biblioteca Nacional pa asina e miembronan di Biblioteca por haci uso di e tabletnan aki na Biblioteca Nacional.
