(NLTimes) – Fundacion di investigacion di mercado Hulandes, SOMI a entrega un demanda contra TikTok ayera den nomber di miles di mayornan preocupa, cu ta acusa e plataforma di rednan social di negligencia den sigura seguridad y privacidad di mucha.
“Den total, e demanda masal por yega na mas di 1.4 biyon euro, basa riba e mas di 1 miyon di usuario Hulandes menor di edad, SOMI a bisa RTL Nieuws.
Te awo, mas di 64mil mayor den Union Europeo a join e caso aki, e fundacion a bisa. Segun SOMI, TikTok ta violando varios ley Europeo, incluyendo leynan di privacidad y leynan cu ta prohibi pone aviso cerca mucha. E app tampoco ta pidi permiso adecuadamente pa uso di data, y no ta bisa ki data ta colecta pa cua proposito. Y e compania Chines tras di e app ta colecta y warda mas data cu ta necesario, y no ta cumpli cu e rekisitonan legal pa tene e data safe, segun e fundacion a bisa.
SOMI tambe ta kere cu TikTok no ta cumpli cu reglanan di medionan di comunicacion Europeo cu tin meta pa ‘protege mucha di contenido dañino’, parcialmente referiendo na retonan online den cual mucha ta reta otro pa haci cosnan peligroso. “SOMI tambe ta kere cu videonan mas general riba TikTok por ta dañino pa muchanan jong, por ehempel pa motibo di avisonan scondi pa productonan dañino, y contenido cu ta promove idealnan irealistico di beyesa, cu por conduci na problemanan manera auto-lesion y desorden alimentario.”
Speransa di e fundacion ta pa e caso aki duna un veredicto legal cu ta forsa TikTok ahusta su accionnan. “Un decision di corte por restringi directamente e practicanan di TikTok – y otro plataformanan di rednan social”, co-fundador di SOMI, Cor Wijtvliet a bisa e noticiero. “Nos a manda cartanan di keho na TikTok y varios autoridadnan di supervision Europeo den ultimo aña, pero no a mira ningun resultado substantivo. Esaki ta pakico nos a dicidi di no warda pa e investigacionnan di e autoridadnan, sino tuma accion legal nos mes.”
Un vocero di TikTok a bisa RTL Nieuws cu e privacidad y seguridad di su usuarionan semper tabata ‘e prioridad di mas halto’. “Nos ta tumando stapnan lider den e industria pa promove seguridad di hubentud riba TikTok, manera haci cuenta di usuarionan bao 16 aña priva pa default, y permiti mayornan link nan cuenta na esun di nan yiu adolescente a traves di Family Pairing. Nos ta continua evaluando y mehorando nos politica-, proceso- y sistemanan, y ta continua consultando cu expertonan externo.”
Oficialmente, solamente muchanan mayor di 13 aña di edad por usa TikTok, y menornan mester permiso di nan mayornan. Sinembargo, den practica, no ta enforsa e limitenan di edad aki di bon manera. Anteriormente e aña aki, un corte na Italia a duna orden pa TikTok blokea usuarionan cu no ta confirma nan edad, despues cu un mucha muhe di 10 aña a fayece durante un reto peligroso riba e plataforma di red social.
