Un Arubiano ta entre e tres personanan cu homenagea durante e NAF Ambassadors’ Awards Dinner, cu a tuma luga ayera na Washington D.C. Periodista reconoci Maureen Bunyan, di Aruba a ricibi un reconocimento special pa su esfuersonan pa mehora e relacion entre Merca y Hulanda.
Bunyan kende no solamente a resalta na Washington DC como un periodista di prestigio y e cara di noticia pa hopi decada na e capital di Merca, tambe a co-fundado di e National Association of Black Journalists, NABJ, y International Women’s Media Foundation, IWMF. Maureen Bunyan, hunto cu Peter Ossterveer, CEO y Director di Arcadis y Marquerite Soeteman-Reijnen, Director y miembro ehecutivo di Directiva di AO Holdings, ademas di ta e Global Chief Marketing Officer di Aon Inpoint a ricibi respectivamente e premionan Embahadornan J. William Middendorf II, C. Howard Wilkins, Jr, y K. Terry Dornbush. Tur tres tabata Embahadornan Mericano pa Reino Hulandes.
E evento anual cu a inicia na 1991 ta un esfuerso conhunto entre e Netherlands-America Foundation, NAF y Holland on the Hill, HotH, un proyecto di e Embahada Real di Hulanda, e grupo di Congreso Mericano pa Reino Hulandes, e comunidad corporativo y NAF.
Durante e cena, Alfred Munzer, MD, ex Director di e Departamanto di Pulmonogia di e Washington Adventist Hospital y ex Presidente di e Associacion Mericano di Pulmon a hiba palabra. Ademas di su funccionnan, Dr. Munzer ta un orador activo riba Holocausto.
Recaudacion di e cena prestigioso aki ta bay pa e programanan di intercambio educativo di NAF. Uno en particular ta pa percura cu studiantenan prometedor di Hulanda y Caribe Hulandes, incluso Aruba, participa na programanan di verano pa yuda hobennan reta nan mes na nivel academico, na e George Mason University. Tambe nan ta experiencia e capital Mericano pa medio di pasantia na Congreso, companianan priva of hasta organisacionnan no-gubernamental.
Embahador di Reino na Washington, André Haspels tabata e anfitrion di e evento, y e Director di e comision organisatorio tabata James Dykstra, kende ta un Mericano di descendencia Hulandes y cu a yega di bishita Aruba na algun ocasion.
NAF cu ta celebra cu di 100 aniversario ta e fundacion bilateral mas importante cu ta inicia y sostene intercambio di alto nivel entre Hulanda y Merca, riba tereno di arte, comercio, maneho publico y preservacion historico.
