Considerando cu ultimamente por a tuma nota den nos medionan social di e aumento di violencia y abuso domestico, casonan di suicidio, divorcio y te na asesinato di pareha, directiva di fundacion Hende Homber a mira e importancia pa organisa un conferencia dirigi no unicamente pa e ser masculino, sino tambe cu participacion di hende muhe y hobennan.

Noel Rendon presidente di e fundacion a splica cu e fundacion a ser lanta na november di aña 2013 y den tempo a confronta cierto retrasonan, awor nan ta enfoca riba e miembronan nobo di e directiva cu segun Rendon mes a sigura, ta trahando duro pa pais Aruba caminda cu pa 4 di november nan kier dedica e dia na un conferencia gratis enfoca riba e tema general “Hombernan cu ta marca e diferencia.”

Nan kier celebra e bienestar di hende homber pero tambe di e hende homber cu ta marcando un diferencia den comunidad lo cual ta nan meta manera Rendon a bisa.

E evento ta bay tuma luga riba diasabra 4 november 2023 den facilidad di Gloria for di 9’or di mainta te cu 3’or y mey di atardi. Ta bay tin oradornan local profesional cu ta bay comparti nan experiencia y profesionalismo, manera psicologo forensico Johnny Boekhoudt, como orado principal, trahado social Rhomyko Winklaar, doctor John Croes, coach financiero Francis Groeneveldt, consultor educacional Raymond Maxwell, Sex Coach Geraldine Alexander y pastor Gino Frans.

E fundacion ya caba tin 10 di existencia pero e no ta hopi conoci, pa lo cual Ted Hasham e fundado a bisa cu e meta cu nan tin como fundacion “tur hende mester di dje y ta pa mehora e posicion di hende homber na Aruba” y pa logra esaki ta bay duna sosten, guia y conseho a traves di un metodo netamente di fundacion pa e integracion di e hende homber den su hogar, trabao, famia y comunidad.

Considerando cu ultimamente por a tuma nota den nos medionan social di e aumento di violencia y abuso domestico, casonan di suicidio, divorcio y te na asesinato di pareha, directiva di fundacion Hende Homber a mira e importancia pa organisa un conferencia dirigi no unicamente pa e ser masculino, sino tambe cu participacion di hende muhe y hobennan.

E idea pa lanta e fundacion a surgi door di un combersacion tocante violencia pa hende muhe y hende homber unda cu pa hende homber mes no tabatin ni un instancia.

Pa personanan cu tin interes di participa den e conferencia “Hombernan cu ta marca e diferencia” por bishita nan Facebook Page Fundacion Hende Homber y registra via e QR Code.