Fundacion hende homber: ‘Hopi hende homber tin miedo of berguensa di bin dilanti’

Fundacion di hende homber a bin dilanti pa papia en cuadro di dia di hende homber. E fundacion a splica tocante e necesidad cu tin na Aruba pa ofrece guia na hende homber cu tambe ta pasa den varios situacion di abuso of problema den famia.

Ted Hasham, presidente di e fundacion a duna di conoce e dificultad cu nan ta confronta pa asina haya hende homber pa uni den e problematica cu tin na Aruba pa locual ta trata abuso of problema.

Normalmente e fundacion lo kier organisa charlanan, programa, sinembargo Hasham ta remarca cu hende homber ta ‘laga hopi di desea e ultimo temponan aki’. “Nos mes ta riba un low profile.”

Ta conoci cu hende homber ta acerca na nan pa tuma conseho. E fundacion tambe ta coach nan den e direccion cu nan mester di dje. Nan ta bezig cu diferente preparacion pa asina e fundacion por crece.

Hasham ta bisa cu pa nan ta dificil pasobra nan no tin hopi miembro, sinembargo e necesidad pa duna yudansa ta grandi ‘cu e tiki cu nos tin nos ta bringa cu e hende homber cu tin problema na den comunidad’.

Pa locual ta trata e situacion pa 2019, Hasham ta splica cu tin mas caso, pero e problema ta keda cu hende homber tin berguensa y miedo ‘hopi di nan ta scondi’. “Nos ta haya entre 15 pa 20 hende homber cu ta acerca pa aña.”

E fundacion mes ta duna conseho y guia, pero ta conseha pa cualkier hende homber mes por acerca pa nan por haya e guia cu mester. Hasham ta bisa cu mayoria di caso ta problema familiar, hende muhe cu ta abusa di nan na un manera fini, abuso verbal, situacion na cas of maltrato. Na comienso, e hende homber ta mustra berguensa pero segun Hasham ora cu combersa cu nan, nan ta cuminsa basha abou nan problema.

“Pa awo nos mester miembro cu tin interes pa duna guia. Nan no mester ta profesional, pero pa por forma un directiva pa por sigui traha. Pa cualkier persona cu kier acerca nan por subi riba Facebook pa fundacion hende homber, nan por haya mi number y comunica cu mi”, Hasham a bisa.

Un miembro di e fundacion, Giovanni Oduber a splica cu el a pasa den varios problema pero el a conoce Ted, kende a duna e guia y yud’e pa e sigui cana bay dilanti ‘mi tabata den un depresion’ sinembargo awo e ta miho y ta conseha pa tur hende homber cu ta pasa den cualkier tipo di problema pa acerca sin miedo.