Diamars atardi, Fundacion Guia Mi tabatin un recepcion senciyo cu presencia di Minister di Husticia, Andin Bikker, miembronan di e directiva di e fundacion y demas invitadonan pa celebra nan 65 aniversario di existencia.
Directora di e fundacion, Anneke Nicolaas-Lucas, a bay un poco den historia di e fundacion cu a wordo crea dia 22 di october 1954, inicialmente bou e nomber di Sint Martinus Stichting. Na aña 1995, e fundacion a cambia di nomber y el bira Fundacion Guia Mi. E ta un instancia di custodia di menor y custodia di famia.
Sra. Nicolaas-Lucas a gradici e directiva cu ta un sosten grandi pa nan por realisa nan trabou y el a expresa cu e directiva aki ‘semper t’ey pa nos’, y e ta sinti un gran sosten for di nan. Tambe el a expresa palabra di elogio pa e trabou cu su team ta bin realisando cu entusiasmo y hopi energia. Ademas nan ta traha cu hopi solidaridad y nan ta sostene otro, aunke tin biaha nan ta yora cu otro den situacionnan dificil cu nan mester atende den nan trabou, pero tambe nan ta expresa nan felicidad, ora cu tin motibo pa esey.
Durante e recepcion aki nan a presenta un video pa conmemora e di 65 aña di existencia.
