Fundacion FEPA ta pa esunnan cu kier un segundo chens den estudio of kier sigui crece. Nan ta ofrece curso y estudio. Director di fundacion a splica tocante plan cu lo tin pa siguiente aña.
Marlon Vrolijk, Director di e fundacion FEPA a amplia pa algun plan cu lo tin manera estudio pa persona Latino (di cualkier pais sur Americano). E ta splica cu tin un movecion den e grupo aki, unda cu nan ta domina un materia, pero den nan idioma.
E ta bisa cu esey ta un forma pa un persona haya oportunidad pa sigui crece ‘pa no keda tene abou pa henter nan bida’. Un grupo cu por haya nan idioma pa e parti di horeca.
Na principio FEPA por a bay te cu 450 curso.
Nan ta bay pa hende grandi y ora nan drenta den nan trabou nan mester ta prepara y cu curso asina nan por sigui crece y no keda semper den housekeeping. E kier pa FEPA ta manera un restaurant caminda tin varios opcion pa tur hende.
“Nos ta mustra comunidad cu nan tin derecho y cu nos ta brinda otro cosnan cu otro no ta ofrece. Nos a pone presion y a traha duro cune pa nos por haya nos conocemento”, e ta expresa. Esaki ta pa beneficia e persona den comunidad.
E persona cu caba nan curso ta haya un certificado. Fundacion FEPA a haya nan reconocemento di curso cu por duna nan certificado conoci pa gobierno asina e ta bira mas facil. Tambe esaki ta reconoci ora nan bay nan pais bek.
El a menciona un ehempel di un persona cu a haci curso di Ingles, el a haci su curso varios biaha y a bay bek su pais cu ta Haiti, eynan el a ser reconoci manera docente di Ingles cu por yuda otro pa siña Ingles.
Mescos ta bay pa e persona cu por sigui curso un biaha pa siman y por siña Hulandes, Papiamento. Un curso di e persona pa bira security den nivel di MBO nivel 1. “A pidi gobierno pa un investigacion di kico realmente mester pa otro aña. Pa uza un bon maneho di informacion. No lubida cu casi 72% di e poblacion no a caba un estudio secundario.”
Pa esunnan cu ta traha 83% di nan no a cab’e. Di 10 hende cu ta traha den sector laboral, 8 no tin scol secundario. Esaki ta ‘alarmante’ segun Vrolijk. Tambe el a ta agrega cu hende por defende den 4 idioma ‘e tin su bentaha’ pero ta un desbentaha den trabou.
Segun Vrolijk, esey ta motibo cu hoben ta cay den droga of otro mal custumber pasobra no tin nada pa ofrece nan. Mester bin cu plan pa trece mas hende cerca den enseñanza pa motibo cu no tabatin esey, nan no a sigui.
Asina ta prepara hende den comunidad pa nan sigui amplia nan conocemento. Un persona cu ta di Sur America por sigui curso na papiamento pa sa e idioma of tambe sigui curso den nan idioma caminda nan por expresa miho.
“Brinda comunidad Latino algo otro, les den idioma di nan preferencia. E ora e persona ta sinti su mes mas motiva, y por scoge otro idioma pa nan sigui cu esey tambe. Tin cu purba complace comunidad den tur sentido”, el a splica.
Pa e di 3 fase cu nan kier bay ta online, pa nan por pasa les na Ingles pa asina e persona por sigui nan les y haci examen cerca nan. Vrolijk ta comparti cu esey ta mas facil pa e persona cu tin un trabou anto nan por sigui e les den nan pauze of di e manera cu ta cumbini nan. Lo prepara docentenan con pa duna e les.
Online ta plataforma unda cu hende por paga un cantidad y cumpra e les online via un aplicacion. E ta pasa na Hulanda y e persona por haya begeleiding. Tambe si tin un Arubiano cu ta bibando na Hulanda e por inscribi y tuma su les online. Tambe tin pensamento pa bin cu mas curso pa sigui keda brinda pueblo di Aruba.
Vrolijk ta enfatisa cu nan t’ey pa un persona cu kier un di dos of tres oportunidad den un onderwijs. Unda cu un persona cu mas di 30 aña di edad por sigui un opleiding y por acerca nan.
E ta menciona cu nan ta e ‘unico na Aruba cu ta bringa pa enseñanza’ pa wordo dirigi pa hende den enseñanza. E ta bisa cu FEPA ta duna curso, pero tambe ta papia cu nan. Pa nan por compronde y wak e necesidad di personanan den comunidad anto kico nan mester. Cualkier cos cu nan tin mester ‘nos ta haci e referencia’.
