Den e ultimo 3 añanan, fundacion Famia Plania Aruba ta bin trahando tambe pa loke ta trata e meta mundial pa desaroyo sostenibel (SDG).

No solamente na nivel nacional nan a wordo acerca pa medio di gobierno pa introduci esaki, pero tambe e fundacion aki ta hancra na International Planned Parenthood Federation (IPPF), esaki ta demanda cu internacionalmente ta wordo pidi pa nan por haci mas uzo di implementacion di e SDGnan.

Metanan
Trahado Social y coordinador di Famia Plania Aruba, Jonathan Trinidad a bisa cu entre 2015 y 2016, ora cu e metanan global a bin dilanti, e fundacion a sa di orienta full riba e parti di su implementacion. Pero tambe riba cual ta e metanan specifico cu nan ta aportando na nan. Nan ta cuater meta of goal cu mas tanto nan ta traha cu nan: 3,4 y 5.

Trinidad, kende ta e persona cu a start e proyecto aki y implement’e den casi tur scol na Aruba, e ta mira cu e aceptacion ta enorme. “Poco poco pero sigur, nan ta compronde cu mesun cos nan tabatin un meta na comienso di aña escolar pa na final bay over, nos tambe tin metanan cu nos ta traha riba nan pa tin nan mas consciente di nos salud sexual”, el a declara na e matutino aki.

Esaki ta un forma pa nos muchanan por compronde cu sexualidad no ta djis e acto sexual so. E ta haya cu ta di lamenta cu awendia ainda tin hende cu ta pensa cu sexualidad kiermen sex, mientras cu e salud sexual ta hopi mas cu esey.

Den e caso aki, e ta referi na e meta 3 cu tin di haci cu Salud y Bienestar. Trinidad a bisa cu e meta aki ta wordo refleha, si nos tin un comunidad -specialmente di nos hobennan- cu sa kico tur ta cay den e meta aki, di bon salud y bienestar. Nan ta haya cu nan ta bira hobennan cu den e caso aki ta bay tuma decisionnan responsabel.

Otro meta di e SDGnan cu fundacion Famia Plania Aruba ta trahando riba dje, ta e number 4 cu tin di haci cu Educacion di Calidad. Durante e entrevista cu Bon Dia Aruba a sostene cu e Trahado Social di e fundacion aki, el a laga sa cu e meta aki tambe ta uno primordial den enseñansa y formacion di e hobennan.

Un meta cu tambe ta resorta cerca e fundacion aki encarga pa un sexualidad responsabel ta e meta 5 di e SDGnan. E meta aki tin di haci cu Igualdad di Genero, kiermen pa para tur desigualdad cu por tin entre homber y muhe.

Igualdad di genero
Trinidad a declara na e matutino aki cu e fundacion ta para y kere ‘profundamente’ den e aspecto aki, di igualdad di genero. Ta di menciona cu como fundacion, Famia Plania ta ofrece 8 servicio pa comunidad y niun di e servicionan aki ta mara na genero.

“Nos simplemente ta trata cu e persona cu ta drenta via e porta, e ser humano. Esey pa nos ta keda importante,” el a bisa.

Ademas di e tres metanan aki, e fundacion ta traha y enfoca riba e colaboracion internacional cu tin di haci tambe cu e meta 17, esta Alianza pa Logra e Obhetivonan. Haciendo uzo di nan lasonan internacional, e fundacion ta haci uzo di diferente rapport cu ta ilustra con e metanan di e SDGnan ta wordo implementa y tambe con e resultado di esaki ta.

Nan ta implementa e meta aki pa loke ta trata nan servicio, producto y innovacion, pero tambe den educacion sexual cu e fundacion ta duna na scol.

Nan a yega di traha video riba e metanan, pero tambe na inicio di cada presentacion, nan ta splica loke ta e metanan pa medio di posternan. No solamente e metanan, pero tambe -no obstante e forma cu nan ta wordo duna- kico nan kier logra. Pero un aspecto importante ta relaciona cu e forma con e logronan di e metanan aki ta aporta na nos comunidad pa aña 2030.

 

 

 

Comments are closed.