Fundacion Dominicana Arubanse Juan Pablo Duarte ta un di e fundacionnan cu a ofrece ayudo y sosten pa comunidad desde cu pandemia Covid-19 a cuminsa y pa nan por sigui cu e labor aki nan a informa cu lo tin un operativo di recaudacion di comestibel principalmente y fondonan pa e fundacion.
Asina a indica pa Bon Dia Aruba e presidente di e fundacion Winston Tavarez ken a menciona cu diasabra awor 19 di december lo tuma luga un recaudacion di comestibel y fondonan pa e fundacion por sigui duna apoyo y ayudo na esunnan cu mas mester di dje, desde 10or di mainta te cu 6or di atardi na e fundacion Juan Pablo Duarte na Playa.
Tavarez a expresa cu esaki ta dirigi pa personanan cu a wordo afecta severamente pa via di pandemia Covid-19, cu algun di nan a perde nan trabou y cu mester di un ayudo den dianan dilanti cu ta temporada di Pasco.
Tambe, el a duna di conoce cu e fundacion ta yuda personanan di tur nacionalidad, desde cu Covid-19 a yega na Aruba nan a yuda por lo menos 1.000 persona di diferente nacionalidad incluyendo Arubiano hunto cu otro fundacion como por ehemplo Fundacion Pa Nos Comunidad y Club Chines.
Pa cu esaki, el a pidi pa comunidad di Aruba pa sigui apoya e labor cu fundacion ta bin haciendo desde añanan pasa, specialmente den temporada aki y asina por alivia e situacion dificil di algun personanan, igualmente desde cu pandemia a cuminsa Tavarez a splica cu nan ta hayando problema cu entrada ya cu nan no ta conta cu sponsornan, el a bisa cu na e momentonan aki tin problema pa paga huur na unda e fundacion tin su localidad.
