Mañan den oranan di mainta, comunidad di Dominicanonan na Aruba lo conmemora nan dia di independencia cu un acto diferente, debi na pandemia Covid-19, na plasa Juan Pablo Duarte na Oranjestad.
Asina a duna di conoce Winston Tavarez presidente di e fundacion Dominicana Arubanse Juan Pablo Duarte na unda el a menciona cu pa motibo di pandemia no lo ta posibel pa tin aglomeracion di hende y cu nan lo bay pone un ofrenda floral den oranan di mainta hunto cu demas organisacionnan di Republica Dominicana cu ta na Aruba como Instituto Duartiano.
“Esaki lo tuma luga masha senciyo mes y lo tin poco invitado” Tavarez a declara.
Despues cu e busto di Juan Pablo Duarte a wordo restaura, Tavarez a bisa cu e fundacion tin algun añanan caba cu ta haci e tipo di actividadnan aki pero cu e aña aki lo bay ta diferente y cu Dominicanonan na Aruba mester cumpli cu e reglanan implementa pa autoridadnan pa loke ta trata e pandemia.
Tambe Tavarez a afirma cu ainda tin personanan cu ta acerca na e fundacion pa busca ayudo y nan ta sigui colectando comestibel y tur tipo di ayudo cu comunidad lo por duna, pa motibo cu un di e efectonan di pandemia ta trata di personanan cu a keda sin trabou y cu nan “tanten cu tin hende den necesidad Fundacion Dominicana lo t’ey pa sigui yuda cu recaudacion di cuminda”, el a bisa.
Manera a wordo menciona den un anterior edicion di Bon Dia Aruba, e fundacion aki ta pasando pa un mal momento na unda nan ta pidi comunidad no solamente pa por yuda esunnan mas vulnerabel sino tambe e fundacion mes pa motibo cu pa via di pandemia nan ta hayando problema cu e huurmento di e local na unda e fundacion ta ubica.
“Nos ta hayando e minimo pa nos por cumpli pero ainda nos ta atrasa cu esey” Tavarez a finalisa.
