Ayera mainta, Fundacion Diabetes Aruba a haci un conferencia di prensa pa informa comunidad di e actividadnan cu nan ta haciendo y tambe lo sigui haci, enfoca riba prevencion di e malesa aki cu ta afecta tanto adulto como mucha.

Charlene Leslie coordinador di proyecto di Fundacion Diabetes Aruba a expresa cu tur esaki ta tuma luga den coordinacion cu Dia Mundial di Diabetes cu ta wordo celebra tur aña riba 14 di november unda e tema di e aña aki ta “Access to Diabetes Care” esaki ta wordo promovi pa Federacion Internacional di Diabetes y ta bay keda vigente pa dos aña, for di 2021 te cu 2023.

Den aña aki nan ta enfoca specialmente riba e parti di “Educacion pa proteha bo mañan” poniendo enfasis tambe den otro actividadnan cu tin relacion cu e malesa diabetes.

Un di nan actividad ta esun cu ya tin tres aña caba enfocando riba maneho propio di diabetes tipo 2 yama “Prisma”, e ta trata di un curso special dirigi pa personanan cu tin e malesa aki pa nan siña maneha e tipo di diabetes 2 un tiki mas miho, e personanan ta ricibi conocemento y hermentnan pa nan por haci cambio den nan estilo di bida, pa asina por maneha e diabetes aki mas miho.

“Nos ta bin haciendo e curso aki pa tres aña caba y actualmente nos tin algun curso activo cu cada persona cu diabetes tipo 2 por participa completamente gratis”, el a bisa.

Ademas, el a informa cu nan tin tres curso mas plania pa loke ta resta di aña y si algun persona ta interesa den e cursonan aki por bishita nan website www.fdaruba.com of por tuma contacto na e number di telefon: 566.50.45.

Banda di esaki, nan tin otro actividad tambe hunto cu Fundacion CVA Aruba, Heart Foundation y Club Kibrahacha cu ta yama “Preveni cu Cuminda” unda esaki ta su di tres edicion cu ta wordo duna den e forma di workshop pa duna informacion riba e factornan di riesgo di diferente problemanan di salud, no solamente diabetes pero tambe malesanan cardiovascular y CVA, akinan e hende ta haya informacion di un manera hopi interactivo y nan lo finalisa cu parti practico preparando recetanan.

Diasabra awor lo tin e workshop aki na Club Kibrahacha unda cu personanan interesa por tuma contacto cu e club aki pa por registra y participa.

Den relacion cu e Dia Mundial di Diabetes nan ta bin haciendo un media tur na medionan di comunicacion, charlanan organisa y tambe ta bay ta presenta na diferente expo di salud cu ta plania caba pa e resto aña aki.

E di cinco edicion di Diabetes Run and Walk cu ta wordo organisa conhuntamente cu Botica di Servicio y otro sponsornan cu ta forma parti di e actividadnan di e fundacion aki lo tuma luga dia 13 di november “pa haci algo bon pa bo mes, algo activo, pero na mesun momento, yudando Fundacion Diabetes Aruba tambe pa nos por yuda comunidad di Aruba mas ainda riba e ramo di diabetes” Leslie a bisa.

Pa e aña aki nan tin planea di surpasa e cifra di 15.000 florin unda cu tur e fondonan aki e fundacion kier enfoca mas riba e prevencion di diabetes.

Franz Sydow, managing director assistent di Botica di Servicio a expresa cu nan ta contento cu e crecemento cu nan a logra den ultimo añanan pa cu e actividad di Run And Walk unda e prome edicion tabatin 100 participante y pa edicion cinco aki ya caba tin mas di 1.200 persona registra pa participa.

“E doel ta pa nos conscientisa pueblo y e problema cu nos tin na Aruba di hopi hende cu tin diabetes, mas cu dobel averahe mundial y esaki ta un problema hopi grandi”, el a expresa.

Pa e evento aki, nan tin e caminata di 5 kilometer, e careda di 10 kilometer y e carera pa muchanan den seis diferente categoria.

E inscripcion ta bay via www.diabetesrunaruba.com of tambe por inscribi na IBiSA, e costo ta di 15 florin pa muchanan y 25 florin pa adulto.

Manera a wordo menciona caba, 14 di november ta Dia Mundial di Diabetes y segun Jasmira Mora Garces coordinador di Praktijkondersteuner voor de huisartsenpraktijk (POH) a señala cu nan tambe ta bay haci un actividad riba e dia aki.

Durante transcurso di añanan semper POH a haci diferente check up pa duna pueblo un chens tambe pa check nan sucu, colesterol, presion, entre otro, di un manera gratis pero e aña aki nan kier enfoca riba e tema di educacion cu International World Federation ta haciendo y p’esey e aña nan a dicidi di bay na diferente traimerdia pa asina muchanan di vijfde cu zesde klas por haya informacion tocante e tema aki.

“Esaki pa nos tambe ta hopi importante, pasobra mi a menciona caba nos ta ripara cu cada biaha e edad ta birando hopi mas jong, e miho manera ta aworaki pa nos cuminsa di trempan pa acerca e muchanan”, Mora Garces a indica.

Nan a escoge e muchanan di e klasnan aki pa motibo cu Mora Garces a señala cu nan tin un tiki mas conocemento di e curpa y nan por compronde mas miho kico ta lo cual cu nan kier splica, “e muchanan tin un voz, y ora cu nan ta un tiki mas grandi nan por ta mas asertivo cerca mama cu papa, pa guia nan den kico ta lo cual nan a siña na scol y nan por practica tambe na cas” el a sigura.

Nan a tuma contacto cu Bureau Traimerdia den cual nan tin shete centro y nan lo bay ta presente full un siman for di 14 di november te cu 18 di november na Scol Primario Kudawecha, Scol Basico di Washintong, Prinses Amalia Basisschool, Colegio Conrado Coronel, Emma School, Scol Basico Xander Bogaerts y Dornasol.

Den colaboracion tambe cu FDA nan lo bay ta presente na dos diferente otro scol cu ta Cacique Macuarima y Sint Dominicus College.

E lesnan aki ta bin for di IDF Kids Programme cu a wordo traduci na idioma papiamento pa Dellanire Maduro.