Ayera durante un conferencia di prensa, Fundacion ConVZLA a haci un yamado pa tur pais internacional interveni pa rebiba democracia na Venezuela, despues di eleccion diadomingo ultimo, den cual Conseho Nacional Electoral a declara presidente Nicolas Maduro como ganador, y cual organismonan internacional a denuncia como dudoso.

Mirian Parra di e fundacion a cuminsa bisando cu e proceso di eleccion realisa na Aruba diadomingo ultimo, pa nan tabata uno claro, transparente y harmonioso, cu a tuma lugar di manera hopi civico. El a gradici miembronan di e Consulado na Aruba pa permiti nan participa den e proceso electoral. “Mi a biba un experiencia maraviyoso, mi a haya acceso pa mira e actanan, pa verifica y scucha tur loke tabata haci.” El a gradici Aruba pa acoge nan, bisando cu Aruba merece respet, paz y trankilidad.

Parra a indica cu e actanan ta duna nan e “poder” pa bringa contra loke nan ta considera e resultadonan falso di eleccion. El a bisa cu e actanan ta demostra cu Edmundo Gonzalez ta presidente di Venezuela.

Sinembargo, Parra a denuncia cu “tabatin asina hopi hende pafo, pero hopi di e Venezolanonan tabata pafo exigiendo pa ricibi cifra.”

“Pakico nan tabata pafo? Pasobra nan no por a realisa nan voto, pasobra gobierno (Venezolano) a manipula—e no a laga pa hopi hende por a vota, pasobra nan a bin ta pidi cedula di Aruba, cu nunca antes a pidi, y si tabatin permiso pa apenas un aña tampoco mag vota; asina tabatin yen motibo cu a pone cu hende no por a vota,” el a bisa.

Parra a splica cu di na e tres mesa di votacion cu nan tabatin na e Consulado di Venezuela na Aruba, Edmundo Gonzalez a ricibi un cantidad di 435 voto, y Maduro 88. El a agrega cu tabatin abstencion di alrededor di 60 porciento, cual aparte di e obstaculonan poni pa gobierno Venezolano, el a atribui na un otro variedad di motibo, entre otro, adultonan mayor cu no por a mobilisa. Parra a indica cu nan tin e “conviccion cu loke nos tabata kier ta e triunfo, y nos a logra.”

Di su banda, Laura Luces a indica cu segun e mas di 80 porciento di acta di votacion di henter Venezuela, cual oposicion tin den nan poder, Gonzalez a ricibi 7,086,966 voto, cual ta 67 porciento, mientras cu Nicolas Maduro a obtene 3,206, alrededor di 30 porciento. “Definitivamente, e triunfo di Edmundo Gonzalez Urrutia na Venezuela tabata un triunfo aplastante y contundente,” Luces a bisa. “Nos a gana na absolutamente tur estado di Venezuela.”

El a menciona tambe cu representantenan di Centro Carter, cu a yega Venezuela como observador pa e eleccion, mester a bandona e pais prome cu por duna nan resumen di eleccion. Di prome, nan a nota cu a haci e registracion pa voto asina dificil, cu no por papia di democracia. “Loke ta interesante ta cu nan a sinti nan mes asina menasa, asina menasa, cu prome cu duna nan veredicto, nan mester a bandona e pais,” Luces a bisa tocante Centro Carter.

Di su banda, Nataly Martinez a lamenta e sucesonan actual na Venezuela pa motibo cu e pueblo, “di manera spontaneo, di manera pacifico” a subi caya pa reclama “e berdad.”

El a menciona algun cifra tambe relaciona cu e manifestacionnan na Venezuela, indicando cu te na e momento a registra 292 herido, y 750 aresto politico. El a indica cu ciudadanonan cu a reuni masalmente cu lider di oposicion Maria Corina Machado y Gonzalez Urrutia a bira victima di agresion di e “colectivonan.”

“Si Venezuela tabata realmente un democracia, lo reconoce e decision di esnan cu a vota pa Edmundo Gonzalez Urrutia,” Martinez a indica. “Y na e momento aki, pueblo ta exigi pa reconoce e actanan.”

Contestando pakico—den su opinion—organismonan internacional no ta actuando a pesar di e disturbionan riba cayanan Venezolano, Martinez a bisa cu teniendo na cuenta e situacion di dictadura na Venezuela, “ta hopi dificil, a pesar cu tanto Colombia como Brazil, y presidente Mericano ta den combersacion pa haci un intervencion humanitario, esaki ta bay ta dificil.”

Representante di Rainbow Warriors Aruba, Milton Ponson, a comenta cu ya cu aparentemente Maria Corina Machado y su comite tin acceso na mas di 80 porciento di e actanan di votacion na Venezuela, nan lo mester duna esakinan na un grupo selecto di medionan di comunicacion internacional, bao instruccion pa no divulga e datonan aki na publico general, pero permiti nan pa usa esaki pa presiona su respectivo gobiernonan pa tuma accion. El a bisa cu e unico manera cu gobiernonan lo haci un yamado pa un intervencion humanitario, diplomatico, pacifico, ta si tin suficiente medionan internacional cu tin prueba di e e ponencia di Machado.

Pa esaki, Luces a contesta cu “nos ta sigur, nos no tin e menor duda cu e team di Maria Corina Machado – kende no ta djis un lider, e ta un stratega – ya lo mester tin tur cos regla. Y mi ta sigur tambe cu e tin comunicacion directo cu presidente Mericano y presidente di Brazil; si no cu e presidente, cu su coleganan. Di esey mi ta sigur cu tur cos ta riba e bon caminda. Nos a gana caba.”

Despues di e conferencia di prensa, ConVZLA a uni un grupo chikito di Venezolano cu a reuni dilanti Consulado Hulandes cu bandera, borchi y hasta wea pa un “cacerolazo” pa exigi gobierno Hulandes, y segun Luces, “tur gobierno internacional”, pa “duna cara pa democracia, duna cara pa e humiliacion y tortura di pueblo Venezolano stop. Ta basta.”

Cantando “fraude” y “se ve, se siente, Edmundo presidente,” e grupo di Venezolano a celebra loke nan ta considera un victoria, y cu speransa, a pidi pa nan bos ser scucha.