Mediante un anuncio Fundacion Contra Violencia Relacional (FCVR) ta solicita ayudo di comunidad cu por colabora den e proyecto di Aruba Doet cu lo tuma luga na maart di e aña aki.
Manera ta conoci, Aruba Doet ta bay tuma luga e dianan diabierna 15 y diasabra 16 di maart 2024, CEDE Aruba en cooperacion cu Oranje Fonds ta organisa Aruba Doet, e accion boluntario mas grandi na Aruba. ARUBA DOET a cuminsa na aña 2013 bou iniciativa di Oranje Fonds. Bou nombernan di NL Doet, Aruba Doet, Bon Doet, Cura Doet, Statia Doet, Saba Doet y SMX Doet, e seis iniciativanan aki ta pone trabou boluntario den spotlight y stimula tur hende pa pone man na obra pa un of parti di dia. Asina Oranje Fonds hunto cu miles di organisacionnan social y partnernan manera CEDE Aruba ta organisa e accion boluntario mas grandi den Reino.
Pa e motibo aki, FCVR tambe ta participando den e proyecto aki caminda nan ta den proceso pa establece un “Thrift Store”, cu ta bay haci uso di dos ruimte. Un ruimte pa e tienda y e otro ruimte pa deposito. E dos ruimte aki, mester wordo opgeknapt, kiermen: Haci nan bashi, haci nan limpi y finalmente verf y drecha algun tema chikito, por ehemplo, blafon, luz, etc.
En bista cu ta trata di dos ruimte y e cantidad di oranan ta 5, ta limita, p’esey nan a calcula cu ta bay tin mester di en total 10 persona pa haci e trabou, manera nan ta sigura.
Pa mas informacion di colaboracion por tuma contacto cu Fundacion Contra Violencia Relacional su Facebook Page.
Boluntarionan ta e motor tras di hopi organisacionnan social. Cu Aruba Doet, CEDE Aruba y Oranje Fonds ta demostra con importante ciudadanonan activo ta pa comunidad. Banda di esey ARUBA DOET ta aporta na e bon imagen di trabou boluntario y ta ilustra con dushi esaki por ta.
Oranje Fonds ta e fondo mas grandi riba tereno social y ta demostra e miho parti di Reino. Pa aña Oranje Fonds ta inverti mas o menos €30 miyon den organisacion y iniciativanan cu ta reforsa e lasonan social na Hulanda y e parti Caribense di Reino. Rey Willem-Alexander y Reina Maxima ta e pareha protector di e fondo aki. Bishita www.oranjefonds.nl pa mas informacion.
CEDE Aruba ta un organisacion cu ta duna sosten na desaroyo y co-financiamento di programa y proyectonan den sector social. E programa y proyectonan aki ta wordo introduci y realisa pa non-governmental organizations (ngo’s). Na Aruba tin hopi NGO’s cu ta haci nan esfuerso pa mehora e facilidadnan social pa comunidad. CEDE Aruba ta yuda NGO’s cu desaroyo y financiamento di tur sorto di proyecto duradero. Bishita www.cedearuba.org pa mas informacion.
